Online Reporter
Nkosilathi Sibanda
IQEMBU leValue Gas lithumele umlayezo oqinileyo kwabancintisana layo kuBulawayo Corporate Social Soccer League (BCSSL) ngemva kokubhaxabula i-ZETDC 7-1.
Ukunqoba lokhu kutshiye i-Value Gas isihlezi endaweni yesithathu ku-logu ilemiklomelo engu-38 ngemva kwemidlalo engu-18, isisele ngomklomelo owodwa kuphela ngemva kwe-Overnight Express ehlezi endaweni yesibili, elandelwa yiSimbisa esesiqongweni.
Ekhuluma leZimpapers Sports Hub, umphathi weqembu leValue Gas uBlessing Masimbe uthe ujabuliswe kakhulu yindlela abadlali bakhe abadlale ngayo, wancoma labadlali abatsha ngokungena kuhle eqenjini.
“Siyajabula kakhulu ngokunqoba lokhu. Bekungumsebenzi omuhle weqembu lonke. Ukaputeni wethu uDylan Vumbunu ukhokhele iqembu ngendlela encomekayo, kuthi uDecent Matyavira ube lomdlalo omuhle kakhulu, wahlohla amabhola amabili. Labadlali abatsha sebengene kuhle eqenjini. Kodwa lokhu akutsho ukuthi umsebenzi usuphelile, sisalohambo olude phambili,” kutsho uMasimbe.
Lanxa iValue Gas ibe yiyo ebambe amehlo, iSimbisa itshaye iGrills 6-0 ukuze iqinise ukubambelela kwayo phezulu ngemiklomelo engu-49.
Komunye umdlalo ojabulise ababukeli, i-Evergold inqobe i-Ostrich 4-3.
Eminye impumela ibone i-Overnight ibambane leRydings Auto nge-2-2, iSpeed Shipping yanqoba iChibuku nge-2-1, iMillennium yabambana leHope FC nge-0-0, kwathi iZimtile leProton zadlala ngokulingana nge-1-1.
Imidlalo yeWarehouse Distributors leNust loweLone Stars leCoca-Cola yedluliselwe phambili.
Ngemva kwemidlalo engu-18, iSimbisa isakhokhela ile-49, ilandelwa yi-Overnight (39), iValue Gas (38), iZimtile (36), iHope FC (35) leChibuku (33). IWarehouse Distributors le-Nust zilemiklomelo engu-29.
Ekucineni kwe-logu, iGrills ilemiklomelo engu-10, kuthi iCoca-Cola isagxile phansi ngemiklomelo emithathu kuphela ngemva kwemidlalo engu-17.
