Online Reporter
Innocent Kurira
IQEMBU lomdlalo wokugijima elakoBulawayo, eleWhite City Stars selilungiselele umncintiswano wayo wesithupha owe-Open Track and Field Championships, ozaqhutshelwa enkundleni yeWhite City ngoMgqibelo.
Umncintiswano lo uzaqala ngehola lesitshiya galombili ekuseni njalo kukhangelelwe ukuthi uhlanganise abagijimi abavela endaweni ezehlukeneyo zelizwe.
Umsunguli weWhite City Stars Athletics Club uManuel Mpofu uthe amalungiselelo ahamba kuhle njalo balindele ukwamukela abazancintisa.
“Sesikulungele ukuphathwa komncintiswano njalo konke kuhamba kuhle. Sikhangele ngamehlo abomvu ukwamukela abagijimi eWhite City Stadium lokuqhuba omunye umncintiswano ozakuba yimpumelelo,” kutsho uMpofu.
Abagijimi bazancintisana emjahweni we-100m, 200m, 400m, 800m, 3 000m le-5 000m, kanye lemidlalo yokugijima eyama-hurdles eye-4x100m le-4x400m.
Kuzaphinda kube lomncintiswano wokweqa.
Umncintiswano lo, osungene kuhlelo lwawo lwesithupha, usukhule wasuka ekubeni ngumsebenzi weqembu nje kuphela, waba ngumcimbi ohlanganisa abagijimi abavela ngaphandle kwakoBulawayo. Lokhu kunika abagijimi abasakhulayo ithuba lokuthola ulwazi lokuncintisana, kuthi asebevele besaziwa bona bahlole ukuqina kwabo njengoba isizini yezemidlalo yokugijima iqhubeka.
UMpofu wake wabika ukuthi inhloso yomncintiswano yikunika abagijimi amathuba okuncintisana, ukuthuthukisa ithalenta labo lokusondela ekufezeni amaphupho abo.
Labo abafuna ukugijima kumele baqale ukubhalisa ngaphambi kosuku lokuvalwa kokubhalisa, njalo akusoze kwamukelwe ukubhaliswa ngosuku lomncintiswano.
Imali yokungena ibekwe ku-US$3 kubagijimi abadala, kuthi abasakhulayo bazabhadala i-US$2. Amaqembu e-relay wona azabhadala i-US$5.
Blessing Chizhande