admin
Thokozile Mbedzi
ABADALA bathi uthando luba lutsha luphinde lube mnandi nxa abantu sebebadala kodwa amazwi la aphenduke ize nanko phela kulexhegu elethuse umphakathi esigabeni seMzikazi eTsholotsho kulandela ukubulala unkosikazi walo.
Ixhegu leli, uNaison Alson Khumalo oleminyaka engu-79 ohlala ngaphansi kwenduna uBenjamin Mpala eTsholotsho libulele unkosikazi walo, u-Eliah Sibanda oleminyaka engu-69 kiviki ephelileyo mhlaka 8 ngehola lika 5 ntambama.
Kuzwakale ukuba uKhumalo wabulala unkosikazi wakhe ngoba engafuni ukuthi anathe umuthi.
Ekhuluma lentatheli kaMthunywa uMnumzana Ndaba Nyathi uthe balokhe betshwaqe imzimba ngesehlakalo lesi.
“Ukhulu uKhumalo wenze into yamehlo. Obaba uKhumalo ngabadala ebesikhangela kibo loba sihlangana lenhlupho njengabatsha.
“UKhumalo ubelokungazwisisani lonkosikazi wakhe ngoba engafuni ukuba anathe umuthi wakhe. Umzukulu wabo uthe evela esikolo ugogo wakhe uMaSibanda wamtshela ukuthi uKhulu uKhumalo uzondile njalo bayaxabana ufuna ukumtshaya ngoba engafuni ukuba anathe umuthi wakhe.
“Besakhuluma uKhumalo wathutsha ethinta imbuzi evela kudla amabele wahle wathatha ihloka wathi ethi agamule uMaSibanda walibamba balidonselana baze bawa lalo bonke phansi. UKhumalo ukhulele uMaSibanda obelokhe esalele phansi wamgamula ngesidindi sehloka kanye esifubeni lasesilevini,” kulandisa uMnu Nyathi.
Uqhubekele phambili echaza ukuthi umzukulu wakhe wathi ebona ugogo esephakathi kwechibi legazi wagijima wayabikela omakhelwane.
Kubikwa uKhumalo enanzelela ukuthi usebulale unkosikazi wakhe waqonda endlini yakhe yokulala wafika wazibophela.
Umzukulu ephenduka labomakhelwane bafika babona uMaSibanda esefile njalo esopha emakhaleni lemlonyeni. Bathi bedinga uKhumalo bamthola elenga endlini yakhe.
Amapholisa abikelwa ngodaba lolu.
Isikhulumi samapholisa esabelweni seMatabeleland North ulnspector Glory Banda ebuzwa ngodaba lolu uthe solufikile ehofisini yabo njalo baxwayisa uzulu ukuba behlukane lomkhuba wokuzama ukulungisa inkinga ngokulwa.
“Udaba lwendoda ebulale unkosikazi wayo ngehloka isifikile ehofisini yethu. Sithanda ukuxwayisa uzulu ukuba ehlukane lomkhuba wokuxazulula inkinga ngokulwa,” kuphetha uInsp Banda.
Online Reporter