Online Reporter
Fungai Muderere
I-TALEN Vision, edlala inguqu kuligi yeZifa kumhlubulo ongezansi yelizwe, isibike ukuba isiphakathi kwamalungiselelo okubumba iqembu elizadlalela ukuthwala inkezo lonyaka.
“Konke kuhamba ngendlela esihlele ngayo kumalungiselelo ethu. Sibumba iqembu eliqinileyo, esifuna ukuthi libe yintshantshu kuyo yonke imincintiswano ezakuba khona kulisizini,” kutsho umgcinisihlalo weqembu uElton Sinyosi.
Uqhubeke wathi: “Kumalanga adluleyo, siqhube uhlelo lokubambanisa abadlali eFilabusi. Kulenkundla enhle, evumela ukuthi abaqeqetshi labadlali balungiselele imidlalo ezayo. Basuthisekile lapho abakhona ngoba bathola abakufunayo okubalisela i-WiFi lokunye. Lokhu kuzenza kube lula ukuthi bahlaliseke ngesikhathi belolonga.”
Ngesizini edluleyo, iqembu leli laqhatsha umqeqetshi uKudzayi Mhandire ukuthi akhuze abadlali.
Umqeqetshi lo wathatha indawo kaGolden Dube njalo uncediswa nguLovert Mabunda.
Iqembu leli lizancintisana lamanye amaqembu afuna ukuba zintshantshu abalisela iBulawayo Chiefs, Zimbabwe Saints, Adachi, Nkayi United leMainline.
Kusenjalo, iBulawayo Chiefs isivumelane labadlali ababili uMalvin Mkolo loKevin Madzongwe. UMkolo uphenduke kuMakhosi Amahle evela kuqembu elaba yintshantshu yePSL, iSimba Bhora. UMadzongwe wayeku Zebra Revolution ekuDivision One.
I-Bulawayo Chiefs iqeqetshwa nguMaxwell Takaendesa Jongwe, encediswa nguBekithemba “Super” Ndlovu.
Kwezinye indaba kuDivision One, iqembu leZimbabwe Saints liqhatshe uPhilani “Beefy” Ncube njengomqeqetshi. Ngesizini edluleyo, uNcube wayeqeqetsha i-Arenel Movers.
