Online Reporter
YiNtatheli kaMthunywa
KULAMALUNGA enye imuli adonselane edale lenduna kulandela insolo zobuthakathi ezibangelwe yingxabano yelifa.
Indaba le, ivele edale lenduna uMutasa lapho uTrymore Matanha esola odadewabo, uJuliet loRutendo Matanha, ngokwenza ubuthakathi ebusuku emangcwabeni abazali babo.
UTrymore uthe lokhu kwenzakala mhlaka 8 Mpandula emzini wabo.
Kubikwa ingxabano phakathi kwamalunga la, emuli yaqala kubangwa ilifa kunye lezitanda ezatshiywa ngabazali babo.
“Ubudlelwano bethu sebububi ngoba ngangizama ukubaxotsha kuleyondawo. Ngalelolanga ngababona besiya emasimini lomuntu oyindoda. Baqalisa ukwenza imithanithani ngemva kwesikhathi kwangathi sebefikelwe ngamadlozi,” kutsho uTrymore.
Uthe ngenxa yalokhu ayekubona, wagijima wazisa usobhuku banyenyela abathathu laba.
Uthe abathathu laba basuka baqonda emangcwabeni emuli ebusuku.
“Baqonda emangcwabeni kodwa udadewethu omncane wathi engibona ngisondela basuka behlabela ingoma ethi ‘Mudododo’.
“Ngazisa usobhuku owathi ngiyehlola ukuthi kukhona yini okungajayelekanga okwakwenzakale emangcwabeni,” kutsho yena.
UTrymore uthe okwakumethusile kwabonakala ekuseni.
“Ekufikeni kwethu ekuseni sathola kugejwe amagodi emangcwabeni womabili njalo ngikholwa ukuthi odadewethu yibo abakwenzayo,” kutsho uTrymore.
Umkakhe, uMandy Mutyebere, usekele izinsolo zakhe esithi wazibonela ingxenye yalokho okwakusenzakala ngawakhe amehlo.
“Bathi befika lenyanga balumathisa amakhandlela njalo kwasetshenziswa izinto zamasiko. Ngabona ingqamu lelembu elibomvu, elabuye laqunywa phakathi beqhubeka ngababekwenza.
“Ngahle ngafonela umkami ukuze ngimtshele okwakusenzakala. Abantwana bethu labo bathatha amavidiyo alokho okwakusenzakala,” kutsho uMutyebere.
Uqhubeke esithi odadewabo laba babehlala bebuya besiya emathuneni.
“Kusukela ngisenda lapha, odadewethu laba bayabuya baqonde emathuneni. Ekuqaleni ngangicabanga ukuthi ngokwesiko, kodwa ngokuhamba kwesikhathi ngaqala ukunanzelela ukuthi kungathi kuyacutshwa inhlabathi lapho,” kutsho yena.
Kodwa odadewabo laba baziphikile izinsolo zokuthi bangena emathuneni kumbe baganga emangcwabeni ab-azali babo.
UJuliet uvumile ukuthi yena lodadewabo bafika kuleyonsimu belenye indoda ukuyaqhuba isiko elithile, kodwa wathi lokho kwakungahlangene lamangcwaba.
“Asizange singene emangcwabeni. Sasebenzisa indlela edlula eduze kwamangcwaba. Liqiniso ukuthi sahlabela ingoma ethi ‘Mudododo’, kodwa lokhu kwakungenxa yokuthi umfowethu lomkakhe babesithuka,” kutsho uJuli-et.
UJuliet uzilandule insolo zokuthi nguye owaganga emangcwabeni.
“Angazi ukuthi ngubani owaganga emangcwabeni. Angikwamukeli ukwetheswa icala lento engingazange ngiyenze,” kutsho yena.
URutendo laye uziphikile izinsolo, esithi zidalwa yimpikiswano yelifa ephakathi kwabo lomfowabo.
“Sasidlula nje eduze kwamathuna. Izinsolo lezi zenziwa ngoba thina sake sanqoba ecaleni lensimu yelifa esasiphikisana ngayo lomfowethu,” kutsho uRutendo.
Uthe ukungezwani kwabo kubi ngemva kokuba yena lodadewabo bathola ilungelo lokusebenzisa isitanda esake sasetshenziswa ngumfowabo.
Kodwa uRutendo uvumile ukuthi amasiko enziwa kuleyondawo.
“Yebo, senza amasiko emhlabeni ongowethu ngokomthetho. Sasihlanza umhlaba ngaphambi kokuwusebenzisa. Lamasiko ayengahlangene ngitsho lamangcwaba abazali bethu,” kutsho uRutendo phambi kwenduna uMutasa.
Induna uMutasa idlulisele phambili ukuthoniswa kwendaba le.
