Online Reporter
Nkosilathi Sibanda
NGEMVA kweminyaka engafika itshumi, kuliviki kwethulwe indaba ejabulise inengi labaqeqetshi bakanobhutshuzwayo kuleli, lapho inhlanganiso yeZifa ebike ukuba sekuzaqala izifundo zesithupha seCAF A kuleli.
Izifundo zokuqeqetsha lezi zamiswa kuleli ngomnyaka ka-2017, kulandela ukujeziswa kweZifa ngenxa yokungaphathwa kuhle komdlalo ngaleso sikhathi.
Inhlanganiso yeZifa, ngaphansi kobukhokheli bukamongameli wayo uNqobile Magwizi, ivuselele iCAF A Licence, kuhloswe ukuvulela abaqeqetshi bakuleli amathuba okuthi benelise lokuthola ezinye izithupha zomdlalo, bafinyelele ukuyaqeqetsha lokusebenza kwamanye amazwe, lapho okulamaligi aphezulu kumdlalo wenguqu.
Izifundo zakuqala zisungulwe enkundleni yeZifa eseMt Hampden, eHarare ngoLwesibili kuliviki.
Ukungabikhona kohlelo lolu okweminyaka eminengi besekubangele ukuthi abaqeqetshi abafuna ukuqhubekisela phambili izifundo zabo baye kwamanye amazwe ukuyathola ulwazi, kodwa ukuphendukiswa kwezifundo sekuzakwenza kube lula ukuthi bathole ulwazi oluphambili besekhaya.
I-CAF A Licence iqakathekile kubaqeqetshi abafuna ukusebenza emazingeni aphezulu kumdlalo webhola lenyawo, okugoqela kuPremier Soccer League (PSL) lezinye izigaba.
Ukuphendukiswa kwezifundo lezi kulindeleke ukuthi kuqinise izinga labaqeqetshi bakuleli, kuvule amathuba amanengi okufunda njalo kukhuthaze ukuthuthukiswa kwebhola lenyawo.
Kusenjalo, iPremier Soccer League isiqinisekise izikhathi lenkundla lapho okuzadlalelwa khona imidlalo ngoMgqibelo langeSonto.
NgoMgqibelo, iSimba Bhora izamukela iScottland eWadzanayi Stadium emdlalweni olindelwe ngabalandeli njengoba amaqembu la elwela ukuhlala phezulu kwengalane.
IFC Platinum ibhekane le-Agama enkundleni yeMandava, iMWOS ileZPC Kariba eNgoni Stadium, iFC Hunters isamukela iHardrock eRufaro. IBulawayo Chiefs ibhekane leCAPS United eLuveve kuthi iTelOne izadlala leTriangle United enkundleni ye-Ascot.
NgeSonto, iManica Diamonds izamukela iNgezi Platinum Stars eSakubva. IHighlanders izabe isekhaya leHerentals College. IDynamos ileChicken Inn eRufaro.
Imidlalo ngokugcweleyo:
NgoMgqibelo: MWOS v ZPC Kariba (Ngoni Stadium), FC Platinum v Agama (Mandava), Simba Bhora v Scottland (Wadzanayi), FC Hunters v Hardrock (Rufaro), Bulawayo Chiefs v CAPS United (Luveve), TelOne v Triangle United (Ascot)
NgeSonto: Manica Diamonds v Ngezi Platinum Stars (Sakubva), Highlanders v Herentals College (Barbourfields), Dynamos v Chicken Inn (Rufaro).
