Online Reporter
YiNtatheli kaMthunywa
IZIGELEKEQE ezinhlanu ebezihlomile zihlasele enye imotsha eKwekwe, esabelweni seMidlands ebusuku zaphuma zithwele omakhalekhukhwini ababiza i-US$410.
Isikhulumi samapholisa eMidlands u-Inspector Emmanuel Mahoko uthe lokhu kuhlasela kwenzakale phakathi kwehola lakuqala ekuseni, mhlaka 23 Mfumfu.
“Impahla engabiza i-US$410 itshontshiwe ngesikhathi izigelekeqe ezinhlanu ebezihlome ngensimbi lamahloka zihlasela inkampani engcwabayo eKwekwe.
“Baqale babatshaya ngemphini yamahloka lensimbi, befuna ukwazi ukuthi imali yenkampani igcinwe ngaphi,” kutsho u-Insp Mahoko.
Kubikwa ukuba izigebengu lezi zeqe umduli, zahlasela onogada ababili lezisebenzi ezintathu. Zathatha amafoni ohlobo lweHuawei Y9, G-Tel Delta, leSamsung A06, qede lapho zadliwa ngumnyama.
Amapholisa asadinga izigilamkhuba lezi.
“Sicela loba ngubani ongabe elolwazi olungancedisa ekubotshweni kwabasolwa laba, ukuthi afike emapholiseni aseduzane,” kutsho u-Insp Mahoko.
