admin
YiNtatheli kaMthunywa
KULINDELEKE ukuthi libesemlonyeni wabantu ibizo likaKhama Billiat nxa sekumenyezelwa abadlali abazathola isicoco kumkhosi wePremier Soccer League (PSL) yeAbsa ngoMvulo.
Umdlali weMamelodi Sundowns lo uphinde wazibeka emehlweni abathandi bebhola ngesikhathi etshaya umambule kumdlalo lapho iSundowns yephule imbali yeKaizer Chiefs ngokuthwala inkezo zePSL. Ngesizini edluleyo iChiefs yathatha isicoco ngemiklomelo engu-69 kanti iSundowns, iqede esiqongweni ngemiklomelo engu-71 okuyimbali etsha.
Ukubeka isibalo esiphezulu semiklomelo yikho obekufunwa ngumqeqetshi weSundowns, uPitso Mosimane.
UBilliat kukhangelelwe ukuthi abuthe izicoco kulezi ezibalisa iFootballer of the Year. Umdlali weZimbabwe lo uqede isizini etshayele iSundowns amabhola angu-12 kuligi. Yena loKeagan Dolly loLeonardo Castro babe lesandla ekutheni iSundowns icine ingumpetha weligi.
Laba abadlali indlela abebeyingozi ngayo kwamanye amaqembu bacine sebesaziwa ngokuthi yi-CBD. UBilliat uzabanga umiklomelo weFootballer of the Year loDolly loHlompo Kekana laye obelesizini encomekayo waze wazitholela indawo eqenjini lesizwe iBafana Bafana. Isicoco lesi sibiza i-R250 000. Ngesizini edluleyo sanqotshwa ngumgadli weKaizer Chiefs, uTefu Mashamaite.
Eminye imiklomelo ezokwethulwa ngowe-Absa Premiership Player’s Player, okanozinti okhangelelwe ukuthathwa nguDennis Onyango oweSundowns. Kubaqeqetshi kukhangelelwe ibizo likaMosimane.
“Sithathe ifulegi leSundowns salifaka phezulu entabeni iKilimanjaro. Ocabanga ukuthi angalehlisa, akanombele ayolithatha. Siwine imidlalo engu-22 kwengu-30. Sihlulwe kathathu kuphela.
“Abantu bacabanga ukuthi iCBD ngabadlali abaziqhayisayo kanti akunjalo. Basebenza kanzima. UKhama uyagijima uyazikhandla nxa esensimini phambili kwegedi. UDolly utshintshile wayodlala kwesokudla, ezama ukwenza isiqiniseko sokuthi iqembu liphetha isizini liphezulu.”
Amanye abizo azomenyezelwa, okuzokhethwa kiwo umdlali ovelele wasemuva, owasesiswini lesicoco somdlali osemncane owenze kahle.
Online Reporter