YiNtatheli kaMthunywa
IZAKHAMIZi ezitshayela izimota edolobheni leKwekwe zizake zibethwe ngumoya kulandela ukubotshwa kwamadoda amane esolwa ngamacala angu-19 okutshontsha ezimoteni ezimileyo.
Ngesikhathi abane laba bebotshwa kutholakale impahla etshontshiweyo ebiza iUS$3 520.
Kubikwa impahla yonke eyatshontshwayo phakathi kwenyanga kaNhlangula kusiya kuMpandula lonyaka ibiza iUS$11 986. Impahla le yayitshontshwa ngesikhathi izimota zime phambi kwezitolo ezinkulu, emabhanga kanye lakwezinye indawo ezisedolobheni leKwekwe lakuzindawo eziseduzane.
Isikhulumi samapholisa esabelweni seMidlands, u-Inspector Emmanuel Mahoko, uthe abasolwa babotshwe mhlaka 8 Mfumfu kwenye i-lodge eseKwekwe, lapho ababehlala khona ngesikhathi besenza izenzo zabo zobugebengu.
Abetheswacala uCosta Ngwenya (48), uSifiso Mapfumo (48) weCowdray Park, uNjabulo Tshuma (51) wePumula East loSikhangele Masuku (56) weLobengula okuzindawo ezikoBulawayo.
U-Insp Mahoko uthe abetheswacala babotshwe kulandela ukuchwayisisa obekusenziwa ngamapholisa ahlola amacala obugebengu, iCriminal Investigations Department (CID).
“Amadoda la amane, abesebenzisana, endaweni okumiswa khona izimota phandle kwezitolo ezinkulu, emabhanga kanye lezinye indawo.
“Bebevula izimota ezitshiywe ngabanikazi batshontshe impahla ezigoqela amakhompuyutha, omakhalekhukhwini, izikhwama zabesifazana kanye lezikhwama zemali kanye lezinye iziligugu,” kutsho u-Insp Mahoko.
Uthe ezinye impahla ezatholakalayo, ezigoqela amakhompuyutha kanye labomakhalekhukhwini, abanikazi sebezibonile.
“Amapholisa asenelise ukuvala amadokethi angu-19 abathinteka kuwo njalo kungenzeka kube lamanye amanengi njengoba uphenyo lulokhu luqhubeka,” kutsho uInsp Mahoko.
U-Insp Mahoko ucele uzulu ololwazi olungancedisa ekuphenyweni kwamacala la ukuthi abikele iCID eKwekwe kumbe aye enkambeni yamapholisa eseduzane.
