Online Reporter
YiNtatheli kaMthunywa
KULAMADODA amabili esiqintini seThokozani Line eNyamandlovu afe ngemva kokulwa ngesikhathi esetshwaleni emavinkilini eSt Peters khonale eNyamandlovu.
Amadoda la okubikwa azalwa muzi munye kubikwa axabana ngenxa yephetshana elikhangisa ngendlu yamakhaza (funeral parlour).
Kubikwa kunyanga ephelileyo uQedisani Ndlovu okubikwa ubephila lomkhuhlane wengqondo loKholisani Tshuma babenatha utshwala lamanye amadoda. UQedisani watshengisa uKholisani iphetshana (pamphlet) aliphiwa ngabanye abantu ababehamba ngemota yenye ifuneral parlour yeGoli elalilandisa ukuba umuntu angabalilunga lali-funeral parlour njani.
UKholisani kubikwa wathi elibona iphepha leli wathi uQedisani usefuna ukungena izinto zeSatanism.
Yikho lapho abaqala ukulwa khona. UShadreck Ncube oleminyaka engu-46 njalo engumnikazi wendawo amadoda la ayenatha kuyo wabalamula qede wabaxotsha endaweni yakhe.
Basuka-ke lapho kodwa bathi behambe umango ongaba yi-75 metres uQedisani wawa.
UKholisani wazama ukumsukumisa kodwa wehluleka ngenxa yokuthi wayedakwe kakhulu.
Ngemva kwalokhu akwaziwa ukuthi kungani kodwa uKholisani wadobha isigodo waqala ukutshaya umfowabo ekhanda kanenginengi.
Umnikazi webhawa uNcube waphinda waphuma walamulela uQedisani andubana amthathe amuse emkulwini wakhe lapho afika wamnika ingubo wamtshiya elele.
Ngelilandelayo uNcube wavuka ekuseni wayakhangela uQedisani wamthola ephefumula nzima okwenza wasuka lapho wayadinga uKholisani esithi uyamtshela ukuthi azothatha umfowabo amuse ekilinika.
Esendleleni uNcube wathola isidumbu sikaKholisani ngaphansi kwesihlahla somganu. Wazisa izakhamizi ezabikela uyise kaKholisani.
Amapholisa abikelwa ngesehlakalo lesi.
Ekubuyeleni ukuyakhangela uQedisani watholakala esedlule emhlabeni.
Isidumbu sakhe sasilamanxeba emhlane lasekhanda njalo esinye isandla sakhe sasivuvukile.
Isidumbu sika Kholisani satholakala silamanxeba emhlana lobuso buvuvukile.
Izidumbu zathwala zasiwa esibhedlela se-United Bulawayo Hospitals ukuze ziyehlolwa. Amapholisa asachwayisisa ngezehlakalo zokufa kwalaba ababili.
