admin
Buhlebenkosi Gaule
KUSASA ilizwe leZimbabwe lihlanganyela lamanye amazwe esizwekazi seAfrica kugujwa usuku lweDay of the African Child. Kwelakithi usuku lolu luzagujwa ngendlela ehlukeneyo nanko phela kuzagcotshwa njalo abantwana besikolo abazaba ngabameli bePhalamende yabatsha.
Intatheli kaMthunywa ixhumane loMnumzana Dalubuhle Sibanda omele uYouth Development Officer esabelweni sakoBulawayo othe ilanga lokuthakazelela usuku lwabantwana beAfrica lonyaka luzagutshwa kugcotshwa abatsha abangu -210 ukuthi babe ngabameli bedale lePhalamende yabatsha.
“Sikhangelele ukuthi abantwana laba bahlangane edolobheni leHarare lamuhla lapho abazakwenza izifungo zokuba ngabameli bedale lePhalamende yabatsha.
“KoBulawayo kuzagcotshwa abangu-12, eMatabeleland North kuzagcotshwa abangu 13 kuthi abeMatabeleland South abangu-13 kumkhosi lo,” kutsho uMnumzana Sibanda.
Indikimba yokugujwa kosuku lolu eAfrica jikelele lonyaka ithi “Conflict and Crisis in Africa Protecting all Childrens rights”.
UMnu Sibanda uchaze ukuthi kumkhosi lo abatsha abazagcotshwa bakhangelelwe ukuthi bethule inkulumo emfitshane ngalokhu uHulumende okumele akwenze lalokhu asekwenzile ekuvikeleni intsha kunhlupho ezitsheyeneyo.
“Abafundi abakhethiweyo bazaqala ngokwethula inkulumo emfitshane ngaphambi kokuthi bagcotshwe,” kutsho uMnu Sibanda.
UMnu Sibanda uphethe ngokuthi kuqakathekile ukuba abantwana babe lePhalamende yabo ngoba lokhu kuyindlela eqondileyo yokuvotelwa abazalandela kusasa nxa sebengabakhokheli belizwe.
Online Reporter