Online Reporter
Nkosilathi Sibanda
MHLAKA 1 Ntulikazi minyaka yonke, ilizwe linanza iminyaka engu-27 selokhu umkhokheli wezombusazwe lenkululeko, uJoshua Mqabuko Nyongolo Nkomo, owaziwa ngabanengi ngokuthi nguMdala Wethu edlula emhlabeni.
Ukwedlula emhlabeni kukaNkomo ngo-1999 kwatshiya ilizwe lidabukile njengoba wayengomunye wabakhokheli ababehamba phambili empini yenkululeko, engumkhankasi womanyano, lesikhulumi esasilwela amalungelo abantu bonke kungelani ukuthi bavela ngaphi.
Ngesikhathi sokwedlula kwakhe emhlabeni, amaphephandaba amanengi aphuma lenhloko zendaba ezaziveza ukudabuka kwesizwe sonke.
Loba kunjalo, ilifa likaNkomo alizange lingcwatshwe laye. Emnyakeni elandelayo, uHulumende kunye lenhlanganiso ezitshiyeneyo baqhubeke bemhlonipha ngemisebenzi etshiyeneyo yokugcina imbali yakhe.
Isakhiwo seJoshua Nkomo Museum eMatsheumhlophe koBulawayo sesiphenduke saba yindawo ebalulekileyo yokufundisa intsha ngempilo lomsebenzi wakhe.
Ngaphansi kukaHulumende weSecond Republic, ilifa likaNkomo liqhubeka lihlonitshwa nanko phela sibona intuthuko esikhona eMaphisa, esabelweni seMatabeleland South. Kwakhiwa iJoshua Mqabuko Nkomo Vocational Training Centre, ukuvuselelwa komuzi, lokwakhiwa kweNyongolo Guest House, okuhlose ukulondoloza imbali yakhe.
Abahlali abanengi eMatabeleland South lakwezinye indawo bathi uNkomo uzahlala ekhunjulwa njengomuntu owafundisa ukubekezelelana, ukuthula lokubambana ngesikhathi ilizwe libhekane lobunzima obunengi.
Lanxa sekwedlule iminyaka engu-27 selokhu wedlula emhlabeni, ibizo likaMdala Wethu liphethwe ezinhliziyweni zabantu abanengi, kanti ilifa lakhe liqhubeka likhuthaza izizukulwane ezintsha ukuthi zisebenzele ukuthula, intuthuko kanye lobunye besizwe.
