Online Reporter
Lovemore Dube
ABOMDLALO wenqindi kuleli baphezulu kokuqoqa umncintiswano wabadlali ababhadalwayo okuthiwa-yi professional boxing koBulawayo ngoMfumfu.
Imidlalo le izakwenziwa eceleni kumbuthano wezemidlalo lamasiko ozakwenziwa ngabeKuzana CEEZ.
Imidlalo lezamasiko sokuqhatsha banengi njalo sokugudule imizi eminengi lamajaha lezintombi eseziphila ngakho.
Ekadeni ezemidlalo lezemiculo, ukugida lamasiko kwakukhangelelwa phansi kuthiwa ngokwabantu abangaphucukanga.
Abatshiyeneyo abakumdlalo wezenqindi eZimbabwe sebebambene bathi akulathuba elingedlula leli koBulawayo ukuthi kuzanywe ukuvusa lumdlalo.
Sekuleminyaka efika-14 kungela imidlalo ye-professional boxing eyenziwa koBulawayo. Lokhu kutsho ukuthi abasukumayo kulumdlalo kumele baye endaweni ezigoqela iChivhu, Harare, Mutare laphandle kwelizwe ukuze bathole ithuba lokuthi balwe labo baphakele ebhanga besiyakudla izithukuthuku zabo.
UGilbert Munetsi loAnderson Sibanda bathe idolobho lakoBulawayo yilo elalidume ngomdlalo wenqindi, njalo lakhupha abadlali ababephezulu abenza umdlalo waphakama.
“Sibone kulithuba elihle abantu bezemidlalo abayisekela ngemali, uHululumende, idolobho lakoBulawayo labanye nje jikelele bekhona ukuthi kube lomdlalo we-professional boxing, sisithi mhlawumbe kuyiwa phambili, ungamemetheka njengakudala,” kutsho uMunetsi eseHarare.
Uthe yena lezinye inkokheli zomdlalo labangena esitikini balwe, balesifiso sokubona umdlalo uvuka koBulawayo.
“Kuyasikhuba ukuthi kufiwe akulalutho olwenzakalayo. Vuka Bulawayo sikulindile ngoba uke wawuphatha lumdlalo,” nguMunetsi lo.
USibanda, oqeqetsha abasakhulayo eseLobengula Youth Centre, uthe bafuna ukuthatha ithuba leli ukuthi umdlalo bawubisele lapho owawukhona.
“Asifuni kubelusuku nje, sifuna kube yikuwuvusa lumdlalo. Sifuna ukuxhumanisa izolo lalamuhla. Kulabobababa abawuphakamisayo umdlalo ukuze ufike lapho okhona lamuhla abanjengoJeff Dube, Ambrose Mlilo, Nokuthula Tshabangu, Ringo Star, Bright Spider, Phillip Striker, Kilimanjaro, Kid Power, Trust Ndlovu labo Sipho Moyo,” kutsho uSibanda.
ISymposium yeKuzana CEEZ ikhangelelwe ukuba khona mhlaka7-11 kaMfumfu.
