admin
Thokozile Mbedzi
KUBE lokujabula okukhulu elokitshini leMagwegwe koBulawayo kulandela ukuthola inhlanyelo, ifethalayiza, ukudla kunye lendawo lapho abaswelayo abasendaweni le abazasungula khona ikopa yokufuya inhlanzi kunye lokulima.
Intatheli kaMthunywa ikhulumisane loSenetha wakulindawo uMolly Ndlovu oveze ukuthi inhloso yekopa le yikuthi abaswelayo labo benelise ukuziphilisa.
“Abadala abaswelayo banikwe ukudla nguMama wesizwe, uMama uMnangagwa kunye lokokulimisa esivandeni.
“Esivandeni lesi abalendawo ngabadala kunye labatsha kodwa abahlala bengabantwana bodwa ama-child-headed families. Banikwe inhlanyelo, amafethalayiza, okokufafaza lenye impahla etshiyeneyo yokulima.
UMama wesizwe wathumela uMsekeli kaMphathintambo uRaj Modi ukuthi anike abantu impahla le,” kuchaza uSenetha Ndlovu.
Uqhubekele phambili waveza njalo ukuthi basungula uhlelo lokufuya inhlanzi ukuze baphathiseke empilweni.
“UMama wesizwe usithembise ukusidingela ipulazi elikhulu lapho esizaqhelisela khona ukufuywa kwenhlanzi okukhangelelwe ukuthi kuthuthukise lempilo zabantu.
“Inzuzo abazabe beyithola lapho izabe ibancedisa empilweni ngendlela ezitshiyeneyo kusiya ngendingeko zabo,” kuphetha uSenetha Ndlovu.
Online Reporter