Online Reporter
Sikhumbuzo Moyo
AMAQEMBU ezemidlalo elizweni athole idlabuzane elikhulu ngoLwesibili ngemva kokuba iKhabhinethi ivume ukwehliswa kwemithelo ethathwa emalini yokungena emidlalweni, okulinyathelo elizanceda amaqembu ukuthi agcine imali ukuze aqhube imisebenzi yawo.
Isinqumo lesi, esimenyezelwe ngemva komhlangano weKhabhinethi ngoLwesibili, siyinxenye yenhlelo zikaHulumende zokwenza kube lula ukuqhuba amabhizimusi.
Ekhuluma ngemva komhlangano weKhabhinethi, uMphathintambo we-Information, Publicity and Broadcasting Services uZhemu Soda, uthe iKhabinethi ivume ukwehlisa ngamaphesenti angamatshumi amahlanu imali ebithathwa yiSport and Recreation Commission (SRC) emalini yokungena enkundleni.
“IKhabhinethi ivume ukuhlolwa kutsha kwemvumo, imithelo lemali ebibhadaliswa zingatsha zikaHulumende.
Kwezemidlalo, kuvunyelwane ukuthi imithelo yeSRC yehliswe ngamaphesenti angamatshumi amahlanu. Kuphinde kwehliswa lemali ebithathwa yiZimbabwe Football Association isuka kumaphesenti ayisithupha yaya kwamathathu, kuthi eyePremier Soccer League yehliswe isuka kumaphesenti alitshumi emalini eseleyo yaya kwamane.
‘Imali le yokubhadalela ukusebenzisa inkundla ebithathwa ngamakhansili yehlisiwe isuka kumaphesenti alitshumi lanhlanu yaya kwelitshumi,” kutsho uMphathintambo uSoda.
Uthe loluhlelo luhlose ukususa imithelo ephinda phindiweyo kanye lemali ebiphezulu kakhulu ukuze kube lula ukuqhuba amabhizimusi.
Ukwehliswa kwemithelo lokhu kukhangelelwe ukuthi kuphe amaqembu ezemidlalo, ikakhulu awenguqu, ithuba lokugcina imali enengi evela emdlalweni ukuze akwazi ukusetshenziswa ekuholiseni abadlali, ukuthuthukisa amaqembu lokuqinisa ukusebenza kwawo.
Isinqumo lesi sihambelana lenjongo kaHulumende yeSecond Republic yokukhuthaza ukukhula komnotho, ukunciphisa indleko zokuqhuba amabhizimusi lokusekela ukuthuthuka kwezemidlalo elizweni.
