Online Reporter
Bhekimpilo Tshalibe
INKAMPANI elungisa inhlanyelo eye-Agriseeds isikhuthaze labo abalendawo zokulima ukuthi bangene kubhizimusi yokulima i-lettuce ukuze bazitshayele imali enhle.
UMnumzana Mduduzi Dube ongu-Agronomist kunkampani ye-Agriseeds ukhuthaze abalimi ukuthi balime i-lettuce ngoba ilenzuzo emangalisayo. Uthe isilimo lesi kasihluphi ukulima.
“I-lettuce ilinywa kusukela ngenyanga kaMbimbitho kusiyacina kuNtulikazi okutsho ukuba labo abalendawo zokulima bangayilima bazitshayele imali,” kutsho uMnu Dube.
Uqhubekele phambili wathi i-lettuce ilomhlabathi ovuma kuwo.
“Sikhuthaza abalimi ukuthi belime i-lettuce kumahlabathi alobumunyu obuphakathi kwe-6 kusiya ku 6.8,” kutsho uMnu Dube.
Isilimo lesi singakalinywa kumele imibheda ilungiswe kuhle esivandeni.
“Sikhuthaza abalimi ukuthi bengakahlanyeli inhlanyelo ye-lettuce baqale benze imibheda engaba yi-1,5m kusiya ku-1,8m babe sebehlanyela inhlanyelo yabo phezu kwemibheda. Ngemva kokumilisa inhlanyelo le kukhangelelwe ukuthi igxunyekwe kutsha ngemva kwamaviki amane,” kutsho uMnu Dube.
Uthe kulezibungu lemikhuhlane evame ukuhlasela i-lettuce.
“Kulezibungu ezivame ukuhlasela i-lettuce ezigoqela ama cutworms, thrips le whitefly, kukanti kulemikhuhlane egoqela i-powdery mildew, corky root kanye le-lettuce mosaic virus.
“Sikhuthaza abalimi ukuthi bafafaze izilimo zabo besebenzisa iMancozeb ukuze babulale izibungu njalo izilimo zabo zivikeleke emikhuhlaneni,” kuphetha uMnu Dube.
