Online Reporter
Lovemore Dube
KUZABE kulombuthano omkhulu wezemidlalo esigabeni se-St Paul’s Mission eLupane, eMatabeleland North kulimpelaviki lapho okuzabe kulemincintiswano etshiyeneyo.
Imidlalo le izabe iphethwe ngabeGatsheni Ville njalo kuzadlalwa inguqu lomdlalo wokuqaga kusukela ngoLwesihlanu kusiya ngoMgqibelo.
Amaqembu eHighlanders Legends leHighlanders Royals ngamanye amaqembu anxusiweyo kulelidili, lokhu kuvezwe ngu-Itai Masawi owenhlanganiso yabadlali abake badla ubhedu.
“Simenywe lamaRoyals njalo sikhangelele ukusuka ekuseni kakhulu ngoLwesihlanu,” kutsho uMasawu.
AbakoGatsheni bathe ngomdlalo wangempelaviki bazaphakamisa iLupane emphakathini.
Isigaba seSt Paul’s Mission sike saba segudwini kusukela ngo1996 sidunyiswa ngabantwana ababegijima kakhulu besesikolo.
Kwavela abantwana abagijima kubo Cape Town labo Ireland bemele ilizwe kumaWorld Cross Country Championship finals.
Kwakugoqela uSingazi Dube, Zondiwe Nyoni, Busi Nyoni, Sibisiso Nyoni loMagaret Mahohoma. Bancintisa abeMatabeleland North batshaya labe Zimbabwe yonke baze bakhethwa ukuthi bamele ilizwe kubanga eliphezulu.
Imizamo yemuli yakoGatsheni ingenza isigaba sazakale njalo sithuthuke. Sebebanengi osamabhizimisi asebesekela inhlelo zokuphakamisa izigaba lapho, abavela khona.
