admin
Buhlebenkosi Gaule
ABALIMI sebexwayiswe ukuba bananzelele amathokazi abo njalo bawagcine kuhle ngoba lokhu kuzabancedisa ukuthi azale akhulise isibaya.
UNkosikazi Simangaliphi Ngwabi onguLivestock Specialist esabelweni seMatabeleland North uxwayise abalimi ukuba kufanele benanzelele amathokazi abo ngoba yiyo kuphela indlela engabaqhelisela izibaya zabo.
UNkkz Ngwabi uchaze ukuba zinengi izizatho ezingenza ukuba amathokazi angazali nxa umlimi engawananzelelanga.
Uthe abalimi kumele bananzelele ukudla okuqondileyo okudliwa ngamathokazi abo ukuze enelise ukuqhelisa isibaya.
“Zinengi izizatho ezingenza ukuba amathokazi angazali. Lokhu kugoqela ukungatholi ukudla okuqondileyo. Abanye abalimi abaphi izifuyo zabo ama-supplement. Lokhu kwenza ukuba ithokazi lingatholi ukudla okweneleyo emzimbeni njalo okuqondileyo.
“Nxa ithokazi lingasatholanga ukudla okuqondileyo lokhu kwenza ukuba lingenelisi ukwamukela inkunzi ngoba licakile,” kutsho uNkkz Ngwabi.
Uqhubekele phambili esithi abalimi kumele njalo bananzelele amathokazi abo nxa ezala okokuqala ngoba ngaleso sikhathi abalimi balakho ukuphambanisa ithokazi lingabe lisazala futhi.
“Kwesinye isikhathi ithokazi liyama ukuzala ngenxa yokuthi umlimi ulakho ukufaka isandla ngesikhathi elincedisa ukuzala kanti usephambanisile lingabe lisazala futhi,” kutsho uNkkz Ngwabi.
UNkkz Ngwabi uphethe ngokuthi kulokuthi umlimi afake isandla umlimi kumele alihlabe ngoba akula okunye umlimi angakwenza ukulincedisa lelothokazi.
Online Reporter