Online Reporter
Bhekimpilo Tshalibe
ABE-VETERINARY Services esabelweni seMatabeleland North sebexwayise abalimi abafuye inkomo ukuthi baqaphele umkhuhlane we-anthrax ezifuyweni zabo ukuze bangatshabalalelwa yizibaya zabo.
UDokotela Maria Jakarasi onguGovernment Veterinary Officer esabelweni seMatabeleland North ukhuthaze abalimi abafuyileyo ukuthi bananzelele izifuyo zingahlaselwa ngumkhuhlane we-anthrax.
Uthe umkhuhlane we-Anthrax uhlasela inyamazana ezitshiyeneyo.
“Umkhuhlane we-anthrax uvame ukuhlasela inyamazana ezigoqela inkomo, imbuzi, izimvu kanye lamabhiza.
“Umkhuhlane lo uyingozi ngoba kawuhlaseli izifuyo zodwa kodwa ulakho lokuhlasela abantu nxa bengadla inyama yesifuyo esihlaselwe ngumkhuhlane lo,” kutsho UDkt Jakarasi.
Isifuyo esesihlaselwe ngumkhuhlane we-anthrax sibonakala ngokuba lomkhuhlane woqhuqho, ukuphefumula nzima, ukuvuza igazi endaweni ezigoqela umlomo lamakhala kanye langemuva.
Uqhubekele phambili esithi umkhuhlane lo uyingozi ngoba kawuhlaseli izifuyo kuphela.
“Umkhuhlane we-anthrax uyingozi ngoba uyahlasela labantu. Umuntu angadla inyama yesifuyo esilomkhuhlane laye uyaba lawo.”
Uthe loba umkhuhlane we-anthrax uyingozi kodwa uyelapheka.
“Sikhuthaza abalimi abafuyileyo ukuthi bahlabise izifuyo zabo ukuze zivikeleke emkhuhlaneni we-anthrax. Kukanti isifuyo singahlaselwa ngumkhuhlane lo sibakhuthaza ukuthi bazinike ama-antibiotics,” kuphetha uDkt Jakarasi.
