Online Reporter
Sikhumbuzo Moyo
UMUNTU osekela iqembu lebhola ulelungelo lokuquma lolusekelo loba yisiphi isikhathi nxa engasuthiseki.
Lesi yisixwayiso esivele kusomabhizimusi uWicknell Chivayo, esiqondise kuqembu leHighlanders kuliviki.
UChivayo uthe ulelungelo lokususa usekelo lwakhe lwemali alunika iHighlanders nxa engasuthiseki ngendlela okusetshenziswa ngayo imali yakhe.
Uthe ukusekela kwakhe ngemali kumele kuhambelane lokuphathwa kuhle kwamaqembu, ukuthembeka lempumelelo.
“Nxa ngingasuthiseki, ngilelungelo lokususa uxhaso lwami loba nini ngaphandle kwesixwayiso,” kutsho uChivayo kumbiko awufake enkundleni zokuxhumana.
“Umthetho ofanayo usebenza lakuHighlanders FC. Ngikhangelele ukuthi abadlali baziphathe emphakathini ngendlela ehambelana lobukhulu beqembu abalidlalelayo. Abakhokheli beqembu kumele bakhokhele ngobuqotho futhi bagcine amarekhodi acacileyo atshengisa ukuthi imali engibapha yona isetshenziswa njani.”
Loba eveze ukungasuthiseki kwakhe, uveze ukuba usevumile ukuthi kukhululwe enye imali engange-US$250 000 iye kuHighlanders kuliviki, ngemva kokungenela kwesinye isiphathamandla esiphezulu sezombusazwe esivela eMatabeleland.
UChivayo ugcizelele ukuthi usekelo lwakhe akumelanga luthathwe njengokuthi kumele kube yinto ayenzayo, njalo amaqembu angalululazi.
“Uxhaso olunikezwa ngokuzithandela akumelanga luthathwe njengelungelo. Ngokuhlonipha okukhulu, angilasikwelede somuntu,” kutsho uChivayo.
Amazwi akhe aze ngemva kokuba eveze ukuthi unike abadlali beScottland FC ibhonasi yemali engange-US$100 000 ngemva kokunqoba kwabo iNsingizini eyeSwatini 1-0 ngeSonto.
UChivayo uthe umvuzo lo uyindlela yokubonga iqembu ngokudlala kwalo, kodwa uphinde wagcizelela ukuthi abadlali baziphathe kuhle.
Uphinde wavikela isinqumo sakhe sokuphawula ngokuziphatha kwamaqembu labadlali abaxhasayo, ngemva kokuba abanye abantu bemqathanise le-Emirates, yona exhasa amaqembu amanengi ebhola.
“Ibizo lami eligcweleyo nguWicknell Munodaani Chivayo, njalo angilabudlelwano leFly Emirates.”
UChivayo uthe usebenzisa imali yakhe uqobo ngaphansi kwenhlelo zokuphathisa leminye imisebenzi yomphakathi, ngakho ulamalungelo okukhuza amaqembu awasekelayo.
“Ngisebenzisa imali yami ngokuzithandela langenhliziyo yonke, kodwa angisoze ngilahle ilungelo lami lokubuza ngemikhuba esenkundleni kanye lokuphathwa kuhle kwenhlelo ngaphandle kwenkundla,” nguChivayo lo.
