Online Reporter
Nkosilathi Sibanda
IZIKOLO zonke elizweni zivulwa kusasa, ngoLwesibili kuqala ithemu yokucina yomnyaka, njalo uHulumende usekhuthaze bonke abathintekayo ukuthi babambane ukuze kuqhutshwe kuhle umsebenzi wokufundisa kwabantwana.
Lamapholisa aselimukise abazali ukuthi bananzelele amasela lezinye izigilamkhuba ngesikhathi abantwana bephindela ezikolo.
Ugatsha lwePrimary and Secondary Education, luthe ithemu yesithathu iqakatheke kakhulu kukhalenda yezikolo njengoba abafundi abakubanga lika-Grade 7, Fomu 4 leFomu 6 belungiselela ukubhala imihloliso yokuphela komnyaka.
Isikhulumi sogatsha lwezemfundo uMnumzana Taungana Ndoro uthe uHulumende wenze ukuhlola ezikolo zelizwe lonke ngaphambi kokuvulwa kwazo ukuze kuqinisekiswe ukuthi konke sekulungile.
“Samukela abafundi, ababalisi, abaphathi bezikolo labanye abasebenza kwezemfundo ngezandla ezivulekileyo njengoba bebuyela esigabeni sesithathu esiqala mhlaka 8 Mpandula 2026. Lesi ngesinye sezigaba eziqakatheke kakhulu emnyakeni wezikolo,” kutsho uMnu Ndoro.
Ugatsha lwezemfundo lukhuthaze abazali labagcina abantwana ukuthi babhadale imali yesikolo lemali yemisebenzi evunyelweyo kungakafiki kumbe ngosuku lokuvulwa kwezikolo ukuze umsebenzi uhambe kuhle.
Uqhubeke esithi indlela zokubhadala kumele zihambelane lemithetho yelizwe ephathelane lezomnotho lemali.
Abaphathi bezikolo bakhunjuzwe njalo ukuthi abazali balelungelo lokuthenga impahla yesikolo, egoqela amayunifomu lengwalo, kubathengisi abasemthethweni nxa impahla leyo ihambelana lezimiso zesikolo.
Ugatsha lukhuthaze njalo izikolo ukuthi ziqhubeke ngokusebenzisa iHeritage-Based Curriculum, kugxilwe ekufundiseni lasekufundeni ukuze abafundi bathole imfundo esezingeni eliphezulu.
Ngasikhathi sinye, abazali, abaphathi bezikolo kanye labanikazi bezimota ezithwala abafundi bakhuthazwe ukuthi baqinisekise ukuthi izimota ezisetshenziswa ukuthwala abantwana zisemthethweni, ziphephile njalo kazigcwaliswa kakhulu.
Ugatsha lwezemfundo luphinde lwakhuthaza bonke abantu ukuthi babambisane ekuvikeleni abafundi, ekulondolozeni isikhathi sokufunda lasekulungiseleleni ukuhlolwa kwabafundi abazabhala imihloliso yokuphela komnyaka.
Isiphetho…
