Online Reporter
Langalakhe Mabena
USkido, ongusaziwayo kwezomculo osebenza eSouth Africa, u-Oscar “Oskido” Mdlongwa, usephinde wengeza omunye umklomelo omkhulu emsebenzini wakhe osugcwele impumelelo ngemva kokuthola Lifetime Achievement Award kuma-32nd South African Music Awards (SAMA32).
U-Oskido, owakhulela eLuveve koBulawayo wafunda eGifford High School, uthole umklomelo lo ohloniphekayo ngoMgqibelo ebusuku eSun City Superbowl esabelweni seNorth West. Ama-SAMA abuyele kulesi sabelo kulandela iminyaka eminengi engazange enzelwe khona, emcimbini obizwa ngokuthi yi-Homecoming Edition.
Umcimbi ubuphethwe nguCassper Nyovest kanye lomsakazi uZanele Potelwa, abaqhubeke lomcimbi ngesikhathi abanye babaculi abadumileyo eMzansi behlonitshwa.
Umklomelo lo uqaphela iminyaka engaphezu kwengu-30 u-Oskido esebenza kwezomculo eSouth Africa, ikakhulu umsebenzi wakhe wokuphayoniya umculo weKwaito kanye leHouse Music, kanye lendima yakhe ekukhuliseni abanye babaculi abadumileyo elizweni.
Ukuhlonitshwa kwakhe kufike ngemva kokuba u-Oskido enikezwe Order of Ikhamanga in Silver nguMongameli Cyril Ramaphosa emcimbini weNational Orders wangomnyaka ka-2026 owenzakala mhlaka 19 kuNkwenkwezi.
Ukuthola kwakhe iLifetime Achievement Award kuma-SAMA kuphinde kwenza lo kube ngumnyaka omkhulu kakhulu kumphathi weKalawa Jazmee. U-Oskido usechithe iminyaka eminengi esemva kwama-decks lasebhodini lenkampani, esakha amathuba okuthi abanye abaculi baphumelele, okugoqela uBoom Shaka, Mafikizolo, DJ Zinhle, Black Coffee kanye loDJ Maphorisa.
Ngesikhathi esamukela umklomelo, u-Oskido wawunikezela kumculi ongasekho uLebo Mathosa njalo wakhuluma ngohambo lweKalawa Jazmee.
Uthe ukuqatshelwa kwakhe kufike ngesikhathi esifaneleyo, ikakhulu ngoba ilebuli kanye labaculi bayo babeke balahlekelwa ngamathuba okuthola ukuhlonitshwa okufanayo ngaphambilini.
U-Oskido wamukelwa ngokuphakanyiselwa phezulu ngabantu bonke, ngaphambi kokusebenzisa ithuba lakhe ukubonga abaculi, abakhiqizi bomculo kanye labalandeli abahambe laye kulolu hambo lweminyaka eminengi.
Kusenjalo, umculi othole iGrammy Award, uTyla, laye ube ngomunye wabaphumelele kakhulu, ethola AfriPure International Achievement Award okwesibili.
UTyla uhlonitshwe ngenxa yempumelelo yakhe emhlabeni wonke kanye lendima ayidlalileyo ekuthatheni umculo waseSouth Africa, okugoqela i-pop, amapiano kanye leBacardi, awuse ezilalelini zamazwe omhlaba.
Umculi we-gospel uHle ubengomunye wabaphumelele kakhulu ngalobo busuku, ethola imiklomelo emibili ethi Female Artiste of the Year kanye Album of the Year nge-albhamu yakhe ethi The Ground We’re On.
UMzukulu laye wenze kahle, ethola Male Artiste of the Year kanye le Best Maskandi Album nge-albhamu ethi Ng’funa Intozami.
I-Amadodana Ase Wesile yathola umklomelo we Duo/Group of the Year, kuthi uParas “Sibalukhulu” Dlamini waqanjwa waba Newcomer of the Year.
UKabza De Small wathola i Best Amapiano Album nge-Bab’Motha, kuthi iMakhadzi Entertainment yathola i Best Traditional Music Album nge-Sesi Ka Rose.
Emiklomelweni yemboni yomculo, uLanga Mavuso wathola i Best Produced Album nge-Therapy: The Other Side, kuthi uLordkez yena wathola i Best R&B nge-You, Me & The 90’s.
