Online Reporter
Nkosilathi Sibanda
UNICHOLAS Mugomori lo-Annie Chirisa yibo abaphuma bezintshantshu emjahweni weZimbabwe School of Mines Marathon oqhutshelwe eKhumalo Hockey Stadium ngeSonto.
Banqobe kumbango we-42km kwabesilisa lakwabesifazane.
UMugomori, ogijimela iqembu le-Odyssey, unqobe emncintiswaneni weMasters Men 42km ngemva kwamahola amabili, imizuzu engu-34 lemizuzwana engu-58, watshiya uTrymore Mahachi weBTM oqede endaweni yesibili ngemva kwamahola amabili lemizuzu engu-47.
Kumncintiswano wabesifazane oweVeteran Women 42km, u-Annie Chirisa oweZimbabwe Republic Police (ZRP) unqobe ngemva kwamahola amathathu, imizuzu engu-20 lemizuzwana engu-37. UHelen Kufahakutizwi oweFitness First uqede endaweni yesibili ngemva kwamahola amathathu, imizuzu engu-53 lemizuzwana engu-17.
Emjahweni wabesilisa owe-21km, uMthokozisi Mhlanga oweBlanket Mine utshaye intambo ngemva kwehola elilodwa, imizuzu eyisikhombisa lemizuzwana engu-38.
U-Isaac Langati weMr Pace uqede endaweni yesibili ngemva kwehola elilodwa, imizuzu engu-10 lemizuzwana engu-48, kwathi u-Israel Muoimba oweWhite Lion waba ngowesithathu ngemva kwehola elilodwa, imizuzu engu-16 lemizuzwana engu-28. UThabo Mapfumo weBlanket Mine waba ngowesine ngemva kwehola elilodwa, imizuzu engu-16 lemizuzwana engu-70, kwathi uMlilo Denford weSuper Stars waqeda endaweni yesihlanu ngemva kwehola elilodwa, imizuzu engu-18 lemizuzwana engu-77.
Kowabesifazane owe-21km, u-Angela Moyo unqobe ngemva kwehola elilodwa, imizuzu engu-33 lemizuzwana engu-47.
U-Ethel Pangisa oweZRP uqede endaweni yesibili ngemva kwehola elilodwa, imizuzu engu-36 lomzuzwana owodwa, kwathi uThobile Ncube, laye oweZRP, waba ngowesithathu ngemva kwehola elilodwa, imizuzu engu-36 lemizuzwana engu-27. UTatenda Chichangane oweBlack Rhinos waba ngowesine ngemva kwehola elilodwa, imizuzu engu-44 lemizuzwana engu-41, kwathi uShalom Nzvimbo, laye oweBlack Rhinos, waqeda endaweni yesihlanu ngemva kwehola elilodwa, imizuzu engu-45 lemizuzwana emithathu.
Emjahweni we-21km wama-wheelchair, u-Elford Moyo oweRacers unqobe ngemva kwemizuzu engu-54 lemizuzwana engu-15.
UCrispen Mperewere oweRacers, uqede endaweni yesibili ngemva kwemizuzu engu-55 lemizuzwana engu-30, kwathi uGoodknows Dziripi owe-Independent waba ngowesithathu ngemva kwemizuzu engu-55 lemizuzwana engu-50.
UNyasha Mharakurwa weIndependent waqeda endaweni yesine ngemva kwemizuzu engu-55 lemizuzwana engu-54. USamson Muroyiwa oweGoromonzi waqeda endaweni yesihlanu ngemva kwehola elilodwa, imizuzu emihlanu lemizuzwana engu-50.
Umgcinisihlalo weBulawayo Athletics Board, uWatson Madanyika, uncome iZimbabwe School of Mines ngokuqhubeka isekela umdlalo wokugijima.
“Siyabonga kakhulu kuZimbabwe School of Mines ngokuqhubeka isekela ezokugijima koBulawayo. Imicimbi efana lale inika abagijimi ithuba lokuncintisa. I-marathon le kayicini ngokuncintisana kuphela, kodwa ikhankasela impilo enhle emphakathini,” kutsho uMadanyika.
Uthe ukubambisana phakathi kwengatsha zemfundo labakhokheli bezokugijima kuqakathekile ekukhuliseni umdlalo wokugijima lokuveza amathalenta amatsha.
Umjaho lo ubulabagijimi abavela emaqenjini atshiyeneyo agoqela iBlanket Mine, Black Rhinos, ZRP, Racers, White Lion, Mr Pace, Odyssey, Fitness First kunye le-Independent.
