Online Reporter
ININA elisile engozini ebuhlungu eyedlule lempilo zabantu abangu-17 ebholohweni leHunyani emgwaqweni obizwa ngokuthi Seke Road ngoLwesibili libonga uNkulunkulu ngokulisindisa kulingozi.
Kulabanye ababili abasindileyo kuleyongozi.
Kubikwa njalo phakathi kwalabo abedlule emhlabeni kulenina lomkalo ababengabakuqala ukufa kulandela ukutshaywa yiloli (haulage truck) ngemva kokuba umtshayeli wayo ephume kweyakhe indlela wayangena kweyezimota ebeziphambana laye.
Iloli le isuke yayatshaya umtshova obusuka esigodlweni seHarare okubangele ukuthi abantu abangu-15 akade bephakathi kwalumtshova batshabalale kugoqela lomtshayeli.
Kubikwa njalo ukuthi ngemva kokutshaya umtshova lo, iloli iwuhudule okwesikhatshana andubana iwele phezu kwawo okubangele ukuthi abantu babandezelwe ngaphansi kwayo.
UVanessa Nyandoro (24) ngomunye walabo abakade bephakathi komtshova lo kodwa ngomusa wasinda.
“Angazi ukuthi ngisinde njani, ngibonga uNkulunkulu ngempilo yami,” etsho njalo ebikela intatheli yeH-Metro.
Ngaphandle kukaNyandoro kulabanye ababili akade bephakathi komtshova abasindileyo.
Umtshayeli weloli uDesire Madariko (54) laye usindile, ulimele intamo nje kuphela wagijinyiselwa esibhedlela.
Omunye akade ephakathi kweloli loMadariko laye usindile kulingozi.
Isikhulumi samapholisa elizweni lonke uCommisioner Paul Nyathi ukhulume kabanzi ngalingozi.
“Ingozi eyenzakale kuSeke Road yedlule lempilo zabantu abangu-17 ngemva kokuba iloli ebilubhekise eHarare ithwele abantu ababili iphume kowayo umgwaqo yayangena kulo owezimota eziphambana layo. Iloli itshaye abantu ababili akade bephakathi komgwaqo bahle bafa khonapho.
“Iloli le isuke lapho yayangqikilana leNissan Caravan Kombi ebilubhekise eChitungwiza ithwele abantu abangu-17.
Ngenxa yokungqikilana lokhu iloli icine ihudula umtshova andubana ibhewukele phezu kwayo.
“Ngokunjalo abantu abangu-15 akade bephakathi komtshova bahle babhubha khonapho, abane (abathathu abakade besemtshoveni loyedwa obephakathi kweloli) balimala.
Izidumbu zithwalelwe esibhedlela seChitungwiza Hospital ukuze ziyehlolwa kwathi abalimeleyo labo basiwa esibhedlela esifanayo.
Omunye umfakazi uthe umtshayeli womtshova ubehlala eZengeza njalo ubetshayela umtshova elubhekise eChitungwiza.
“Umtshayeli weloli kukhanya wehluleke ukuqondisa imota yakhe wasephuma endleleni wayatshaya abantu ababili ebebechapha umgwaqo andubana ayetshaya umtshova. Ngemva iloli ihudule umtshova andubana iloli iwele phezu kwawo.
Umtshayeli weloli esesibhedlela, ubike ukuba akazi ukuthi kuhambe njani.
“Ngibone nje iloli isiphuma umgwaqo sengisehluleka ukuyiqondisa, angazi sibili ukuthi kuhambe njani. Ngicine sengiphuma kwesinye isikhala ngemva kokubhewuka kweloli,” kutsho umtshayeli uDesire Madariko.
UMadariko, osesibhedlela uthe ubetshayela iloli le esuka eChitungwiza elubhekise eMalawi.
