Online Reporter
Innocent Kurira
UMQEQETSHI wamaWarriors uRamon Catalá uzakhokhela iqembu lamaWarriors emdlalweni wakhe wokuqala ngoLwesine, ngesikhathi amaWarriors eqala umkhankaso wokudinga indawo ku-Africa Cup of Nations (Afcon) ka-2027 edlala leSierra Leone e-El Jadida, eMorocco.
Umqeqetshi lo ovela eSpain, owaqhatshwa ngoNcwabakazi uphiwe ikhontileka yokusebenza iminyaka emine, ube lesikhathi esifitshane sokulolonga labadlali bakhe abatsha.
Lokhu kwenza umdlalo wangoLwesine owe-Group E ube lithuba lokuqala lokubona ukuthi umisa njani abadlali.
UCatalá useke waveza ukuthi ufuna amaWarriors adlale ibhola elihlaselayo njalo elilamandla.
Umdlalo leSierra Leone uzanika abalandeli beqembu umbono ngalumqeqetshi.
Umqeqetshi weHighlanders njalo owayengukaputeni wamaWarriors, uBenjani Mwaruwari, uthe indlela uCatalá ahlele ngayo kumele iqakathekiswe.
“Ibhola ngezinye izikhathi lingaba lamathuba amancane. Ungadlala kuhle kodwa ucine ungayitholanga impumela, yikho kumele sibheke umnakano olethwa ngumqeqetshi omutsha lokuthi abadlali bamukela njani imibono yakhe,” kutsho uMwaruwari.
Amalungiselelo kaCatalá abuyiselwe emuva yikulimala kwabadlali uTino Kadewere, Prince Dube lemvimbi yeLiverpool u-Isaac Mabaya.
ISierra Leone layo ilahlekelwe ngabanye abadlali ngenxa yokulimala, okugoqela umdlali wesiswini uHindolo Mustapha imvimbi u-Emmanuel Samadia.
UCatalá kumele alungiselele aphelele ngoba amaWarriors azaphinda abe lomunye umdlalo onzima leDemocratic Republic of Congo (DRC) ngemva kwensuku ezine.
Umdlalo weDRC uzadlalelwa eNational Sports Stadium eHarare mhlaka 28 Mpandula, ngemva kokuvuselelwa kwenkundla le, njalo uzakuba ngumdlalo wokuqala wokuncintisana wamazwe omhlaba amaWarriors awudlalela ekhaya ngemva kweminyaka edlalela kwamanye amazwe.
Okwakhathesi amehlo ase-El Jadida, lapho uCatalá azakhokhela khona amaWarriors emdlalweni wakhe wakuqala.
Blessing Chizhande