Online Reporter
Imbiko yokudlwengulwa kwabantwana kanye labesifazana iqhubeka isanda kuleli kanye lakwamanye amazwe. Okudanisayo yikuthi inengi lalabo bantu abadlwengula abantwana kanye labesifazana ngabantu abayabe bekhangelelwe ukuthi babavikele kulokhu kuhlukuluzwa.
Kungakho-ke kusuka kudanise ukuthi lokhu kungabe kubangelwa yini? Kambe lokhu kubangelwa yimimoya esikhona kulezinsuku yokungaziphathi kumbe njalo yikuthi labo asebenze amacala afanayo baphanga baphume emajele okwenza abangakenzi amacala afanayo babone sengathi isigwebo secala leli sifitshane njengoba siphanga siphele.
Inengi lalabo abadlwengulayo ikakhulu abantwana abancinyane bacina bengasathembi umuntu njalo bengasenzi kuhle ezifundweni zabo ngenxa yokuhlukuluzwa abayabe bekwenziwe.
Esigabeni seFilabusi kuvele ukuthi kulexhegu elidlwengule abazukulu balo ababili, oleminyaka engu-13 lole-12 kukanti kulomunye njalo umakorokoza okubikwa laye udlwengule amadodakazi akhe amathathu amahlandla ambalwa.
Indaba lezi ziveza ukwehluleka kwabanye abantu besilisa ukuzithiba imizwa yabo baze bacine behlukuluza igazi labo.
Indaba lezi zidida ingqondo njalo zenza wonke ozele umntwana oyintombazana ahlale ezidla ingqondo ngokuthi umntanakhe uphephile kumbe uvikeleke okunganani ekuhlukuluzweni ngabesilisa ngoba inengi labo kalingasathenjwa.
Kungumbono waleliphephandsba ukuthi amapholisa kumele afinyelele kuzo zonke izindawo; emadolobheni, emaphandleni ngitsho lasemapulazini efundisa ikakhulu abantwana ngokuhlukuluzwa emacansini.
Lokhu kuzaphathisa njalo ukuthi abantwana laba benelise ukubikela abazali, amapholisa ngitsho lababalisi babo nxa bengahlukuluzwa.
Kukanengi sisizwa ukuthi abantwana bangahlukuluzwa ngabadala baphiwa izivalamlomo kukanti abanye bathenjiswa ukubulawa ukuthi bangakhulumi. Izivalamlomo lezo yizo ezenza lowo odlwengula umntwana aqhubeke iminyaka eminen gi emhlukuluza.
Nxa abantwana bangaba lolwazi kubalula ukuthi bangahlukuluzwa bakhulume masinyane izigangi zibotshwe ngoba phela zifana lababulali xathu.
Siyananzelela ukuthi asikho isigwebo, imali loba ukuxolisa okungenza lo ohlukuluziweyo akhohlwe ngesenzo lesi kungakho kuba linxeba elihlala lichinca igazi mgaso sonke isikhathi. Kungakho ke kungumbono laMthunywa ukuthi labo abatholakala belamacala okuhlukuluza abantwana baphiwe izigwebo sikadilikajele ukuze bangaqhubekeli phambili bephambanisa impilo zabantu ngokubahlukuluza.
Kukanti ke kulabo abahlukuluzwa bangakhulumi icala kaliboli kabasukume baye emapholiseni aseduze bayebika ngokuhlukuluzwa abakwenziwayo ngoba phela nxa kungazange kuphumele egcekeni isikliwi leso sizitshaya isifuba sithi sanqoba ngoba singazange sike sivalelwe ejele njalo saqhubeka ngempilo yaso kukanti sona kumele sijeziswe.
Kuviki ephelileyo kulendoda eyahlukuluza omunye umntwana yabaleka yayahlala eGoli iminyaka engu-15. Ithe ifika yabotshwa njalo igwetshiwe kuviki edluleyo.
