Online Reporter
YiNtatheli kaMthunywa
INDODA yeMutare isele idabukile ngemva kokuthola ukuthi umkayo kuthiwa wabhadala imali kumfazi wendoda ayethandana layo, ezama ukufihla ubudlelwano babo obungekho emthethweni.
Lezi zambulo ezimangalisayo zivele phambi kwenkundla yenduna uMutasa ngoMgqibelo odluleyo, lapho uFarai Chiroto abemangalela umkakhe, uEnelesi Muchiko, kanye lowesilisa okuthiwa wayethandana laye, uMisheck Wafangepi, ngobudlelwano bothando okuthiwa babusenzakala phambi kwakhe engazi.
UChiroto uthe wayesehlale ehlukunyezwa ngamazwi okuthi uMuchiko wayethandana loWafangepi, umakhelwane otshadileyo, kodwa wayengelabo ubufakazi bokubhekana labo.
“Indaba yonke yaqala ngamahungahunga. Abantu babehlala bengitshela ukuthi indoda le yayithandana lomkami, kodwa ngangingelabo ubufakazi,” kutsho uChiroto.
Ukusola kwakhe kwaqinisekiswa ngemva kokuzwa ukuthi umfazi kaWafangepi wayebabambe ndawonye njalo wafuna isinxephezelo.
“Ngemva kwesikhathi ngezwa ukuthi umkakhe wababamba. Wathi esebhekane labo, umkami lendoda le kuthiwa bazama ukumbhadala imali ukuze afihle indaba le,” utsho njalo.
Ngokutsho kukaChiroto, umkaWafangepi wambikela ukuthi bobabili babetshelwe ukuthi babhadale i-US$300 umuntu ngamunye njengendlela yokufihla ubudlelwano babo ngemva kokubanjwa.
“Wangitshela yonke into. Wathi umkami kwakumele abhadale i-US$300, lomkakhe laye kwakumele abhadale i-US$300. Kodwa umkami wabhadala i-US$80 kuphela.
“Okungizwisa ubuhlungu kakhulu yisizatho sokuthi kungani babebhadala. Babebhadala ngoba bengelacala. Babebhdala ukuze ngingaziswa ngokwakusenzakala,” kutsho uChiroto.
UChiroto uthe ngesikhathi eqala ukubhekana loWafangepi ngodaba lolu, umakhelwane wakhe waphika konke.
“Ekuqaleni wenza angathi akukho okwenzakeleyo. Kodwa ngamtshela ukuthi umkami wayesevele engitshele okwakwenzakele. Yikho lapho acina evumile,” utsho njalo.
Indoda eyayikhohlisiwe iphinde yathi uWafangepi wasebenzisa isikhathi ayesemsebenzini ukuze alale lomkakhe esitolo esincane esasisegcekeni lakhe.
“Indoda le yayikwazi ukuhamba kwami. Yayilinda ngiphume ngisiya emsebenzini, umkami avale isitolo masinya. Yona yayisilala lomkami phakathi kwesitolo sami, egcekeni lami.
“Singomakhelwane. Yikho okwenza lokhu kube buhlungu kakhulu,” kutsho uChiroto. UWafangepi kazange aphike izinsolo lezi.
“Ngaqala ukuthandana lomkakhe ngoNhlolanja, sabanjwa ngoNkenkwezi. Salala ndawonye kabili.
“Kwakusenzakala esitolo sabo. Ngangisazi ukuthi utshadile, lami ngitshadile. Ngilomkami labantwana ababili,” kuvuma uWafangepi.
UMuchiko laye wavuma ukuthi wayethandana loWafangepi.
“Ngilabantwana abane lomkami njalo ngiyavuma ukuthi ngakhohlisa umkami ngithandana loWafangepi,” utshele inkundla.
Kusinqumo sakhe, uChief Mutasa usole kakhulu ubudlelwano lobu, esithi sebulimaze imitshado emibili njalo sebuthinte imuli ezimbili.
“Awungeke ulungise udaba ngokuhlawula umuntu ukuze alufihle. Iqiniso licina livelile.
“Okwenzakeleyo lapha kuthinte imuli ezimbili. Kukhona indoda ekhohlisiweyo, njalo kukhona lomfazi othole ukuthi umtshado wakhe ubuphazanyiswa ngomunye umuntu,” kutsho induna Mutasa.
Induna yalaya uMuchiko ukuthi anike umka Wafangepi inkomo eyodwa kumbe i-US$350 njengenhlawulo yokulimaza umtshado wakhe. UWafangepi yena walaywa ukuthi anike uChiroto inkomo ezinhlanu njengenhlawulo.
“Imitshado kumele ivikelwe. Nxa abantu bethatha izinqumo ezinjengalezi, kumele bazwisise ukuthi izenzo zabo azithinti abantu ababili kuphela. Abantwana lemuli zonke zingahlupheka,” kutsho induna uMutasa.
