Online Reporter
YiNtatheli kaMthunywa
KULESALUKAZI esileminyaka engu-77 esenze isimanga kulandela ukulwisa enye indoda eleminyaka engu-54 izama ukusidlwengula.
Ugogo lo, esingeke sachaza igama lakhe ngenhloso yokumvikela, ubelesibindi sokulwisana lendoda le, uAmos Sidingani waze wamthathela ingqamu ayemfake yona emphinjeni ezama ukumethusela ngokumquma umphimbo.
USidingani umiswe ngoLwesithathu emthethwandaba esetheswa icala lokuzama ukudlwengula njalo uzaphenduka emthethwandaba ngoLwesihlanu.
Ezama ukuzivikela phambi kukamantshi uNkosikazi Sibonginkosi Mkandla uthe: “Angizange ngilenze icala leli. Umamangala utshele inkundla ukuthi ngelanga lelo kwakumnyama, pho wabona njani ukuthi kwakuyimi?”
UGogo unike ubufakazi obuthinta inhliziyo, elandisa ngokucacileyo ukuthi wasinda njani ekudlwengulweni.
“Ngezwa umsindo emnyango ngasengikhanyisa i-torch. Ngabona umsolwa emi emnyango egqoke ibhatshi elimnyama elide, i-T-shirt emhlophe lebhulugwe elibomvu elidala,” kutsho ugogo.
Uqhubekele phambili watshela inkundla ukuthi umsolwa wamlanda wamfaka ingqamu entanyeni yakhe emsongela ngokumgwaza, kodwa yena wamelana laye walwa wamemeza edinga uncedo.
“Kwathi esezwe omakhelwane besiza emzini wami wabaleka. Omakhelwane babona unyawo balulandela bamthola emzini wakhe, lapho iyembe yakhe yayilatshatha egazi,” kutsho ugogo.
Ubufakazi bepholisa elaliphenya icala buvumelane lobuka gogo.
“Sathi simbopha, iyembe yakhe yayilamatshatha egazi njalo wayegqoke ibhatshi elimnyama,” kutsho ipholisa elaliphenya.
Umtshutshisi uNkosikazi Karen Gundani utshele umthethwandaba ukuthi mhlaka 12 Ncwabakazi 2026, ngehola le-11:30 ebusuku, emzini osendaweni yeLuhonja Line, koSipepa, umamangala wayelele endlini yakhe yokulala ngesikhathi evuswa ngumsindo womnyango owawuvulwa ngamandla ngumsolwa.
“Umamangala wavuka embhedeni wakhanyisa ithotshi. Umsolwa wangena endlini yakhe yokulala wasesondela kuye.
“Umamangala wamemeza edinga uncedo kodwa umsolwa wamtshela ukuthi athule, wamsongela langokumbulala ngengqamu,” kutsho uNkkz Gundani.
USidingani wasunduza ugogo embhedeni wazama ukumdlwengula, kodwa ugogo wala, walwa laye ngamandla.
