Online Reporter
Yintatheli kaMthunywa
UDLAME phakathi kwabathandanayo ezindlini luthinta lalabo asebeluphele!
Kwenzakale udaba oluzwise abantu abanengi ubuhlungu lapho okubikwa ukuba ugogo oleminyaka engu-63 yokuzalwa, wesiqintini seMatshetsheni eGwanda, eMatabeleland South ebotshwe ngeviki edluleyo ngemva kokusolwa ngokubulala umkahle, oleminyaka engu-70.
Ugogo lo, uMiriam Ndlovu kubikwa “wahlahlela” umkakhe uHarold Ngwenya kabili ekhanda ngehloka, ngesikhathi ezama ukumvikela ekutshayeni indodakazi yabo.
Ugogo ubhekane lecala lokubulala uNgwenya, owafela khona lapho emzini wabo mhlaka 11 August 2026 ngezikhathi zehola lesihlanu ntambama.
Osaphethe isikhundla sesikhulumi samapholisa esabelweni seMatabeleland South u-Assistant Inspector Stanford Mguni uqinisekise isehlakalo lesi, ebika ukuba uNgwenya wayephikisana lendodakazi yakhe uHappiness Ndlovu, ngesikhathi kuvuka udlame.
“UNgwenya waphikisana lendodakazi yakhe eyamtshela ukuthi ungumthakathi.
UNgwenya watshaya indodakazi ngesibambo sehloka ekhanda duzane kwelihlo,” kutsho u-Asst Insp Mguni.
Uthe uNdlovu wangenela ezama ukuvimba umkakhe ukuthi angaqhubeki etshaya indodakazi yakhe.
“Ngesikhathi ezama ukumvimba, umsolwa wamehlula uNgwenya, wamthathela ihloka wasemtshaya ngalo kabili ekhanda. UNgwenya wawela phansi wafela khona lapho,” kutsho u-Asst Insp Mguni.
Udaba lwabikwa emapholiseni, okwabangela ukubotshwa kukaNdlovu.
Isidumbu sikaNgwenya sathathwa sahanjiswa emotsha yesibhedlela seGwanda Provincial.
U-Asst Insp Mguni uxwayise uzulu ukuthi angaphendukeli kubudlwangudlwangu nxa kulokungezwani emulini kumbe emphakathini.
“Sikhuthaza uzulu ukuthi angasebenzisi udlakela nxa ebhekane lokungezwani. Kulelicala, bebengacela uncedo kubakhokheli bomdabu kumbe amalunga emuli ukuze balungise ingxabano yabo.”
Ubuye waxwayisa uzulu ngokuphatha izikhali eziyingozi, esithi zingasetshenziswa ekwenzeni amacala abuhlungu njengaleli.
