Online Reporter
Lovemore Dube
I-ZIMBABWE Olympic Committee (ZOC) iqina ngohlelo oluzakwenza ezemidlalo zibeyindawo eyamukela wonke umuntu.
Kumpelaviki edluleyo inhlanganiso le ibikoBulawayo izofundisa abantu abangamatshumi amane (40) abephethe ezemidlalo kumhlubulo ongezansi yelizwe.
Le yimizamo yokuthi abasakhulayo labesifazane baphatheke kwezemidlalo kungelakwesaba.
Loluhlelo luhlose lokuthi abagogekileyo bazizwe labo bekhululekile, lamalungelo abo eqakathekiswa.
Loluhlelo lubizwa ngokuthi “Safeguarding in Sport” njalo belukhokhelwa nguTawanda Sithole olilunga leZimbabwe Olympic Committee.
IZimbabwe Olympic Committee yinhlanganiso egoqela imidlalo eminengi ekuma-Olympics.
Inhlanganiso le ifuna kube lokuziphatha okulungileyo kulabo abaqoqa imidlalo. Abahambe kuloluhlelo bafundiswe okunengi ngezimidlalo.
Omunye obekhona nguGlory Gijima omele iTennis Zimbabwe.
USpecial Programmes Officer weZimbabwe Olympic Committee uvule amehlo labo akade bekhona ngokuthi inhlanganiso zama-Olympics zisebenza njani.
Ngemva kohlelo abangamatshumi amane baphiwe izithupha zokuthi sebezintshantshu zohlelo njalo sebengaphathisa ukukhulisa ezemidlalo kuleli.
Ngemva kohlelo, uSithole uthe: “Ngisuthisekile ngenani labantu abaphatheka ehlelweni bevela kungatsha zamaqembu lenhlanganiso zemidlalo ezitshiyeneyo. Njalo lengxoxo ezibekhona ebezijulile. Ngithakazelele indlela abasebenze ngayo.”
Kube lokunye abakubone kukubi kwezemidlalo okufana lokutshintsha iminyaka, ukuthengisa imidlalo, ukubamba imidlalo ngendlela engalinganiyo lokuzenza ingqwele lokuvalela abanye phandle okuyizinto ezihlupha ezemidlalo jikelele.
