Online Reporter
Yintatheli kaMthunywa
OWAYENGUMDLALI wenguqu kuleli, ehlonitshwa ngabanengi ngenxa yesiphiwo sakhe, uJoel “Josta” Ngozo kukhanya uzithanda okwamagama imbanje, nanko ubanjwe xhaka ezihotsha eMakokoba koBulawayo.
UNgozo (36), ongumnawakhe kamqeqetshi uJohannes, wake wadlalela iHighlanders, FC Platinum leCaps United. Ubotshwe ngemva kokukhandwa ngamapholisa besebenzisa isidakamizwa, bephakathi kwelinye ibhizimusi lokulungisa inwele.
Umiswe phambi kukamatshi uMnumzana Themba Chimiso eloKudzai Matshazi (21), uMduduzi Ngulube (46), Erick Ngulube (23), Monalisa Sindisiwe Cheche (36), Ndodana Moyo (43), Lawrence
Ndlovu (23), Andile Tshuka (26), Mlamuli Ncube (33) loWinter Foster Chisale (53).
Bonke balivumile icala lokutholakala bebhema imbanje okungekho emthethweni, okulicala elichazwa ngaphansi kukaSection 157(1)(b) eseCriminal Law (Codification and Reform) Act, Chapter 9:23.
Ngamunye bahlawuliswe iUS$200 kumbe, njalo nxa bengehluleka ukubhadala bazagwetshelwa ukuhlala ejele okwensuku ezingu-30.
Umantshi uChimiso uxwayise abasolwa, esithi iZimbabwe “ilwa impi yezidakamizwa” njalo inani labantu abaqhubeka bevela emthethwandaba ngamacala aphathelane lezidakamizwa litshengisa ubukhulu baloluhlupho.
“Inani labephula umthetho litshengisa ukuthi kulohlupho olukhulu lwezidakamizwa njalo umthethwandaba kumele uthumele umlayezo wokuthi uHulumende ulwisa ukusetshenziswa kubi kwezidakamizwa lezinye izinto ezilimazayo,” kutsho uMnu Chimiso.
Uthe uHulumende usebenzisa imali enengi ekulwisaneni lokusetshenziswa kubi kwezidakamizwa, esithi kuyakhathaza ukuthi amacala aphathelane lezidakamizwa aqhubeka esanda.
Umtshutshisi uMnumzana Samuel Mpofu utshele inkundla ukuthi ngehola lesikhombisa ntambama mhlaka-4 Mpandula, amapholisa eCID Drugs and Narcotics koBulawayo, abona abasolwa bebhema imbanje phakathi kwesinye isitolo sokulungisa inwele eMakokoba.
“Abasolwa bacelwa ukuthi baveze imvumo kumbe ilayisensi ebavumela ukubhema umbanje, kodwa behluleka ukuyiveza, okwabangela ukuthi babotshwe.
