Online Reporter
YiNtatheli kaMthunywa
USOMABHIZIMUSI olodumo koBulawayo, uGift Banda usecele abaphathi, abalandeli lezinye iziphathamandla zenguqu ukuthi bahlangane ndawonye balungisise iqembu leHighlanders, loba libhekane lobunzima bemali lokuxabana.
UBanda, owake wabangumsekeli kamongameli weZimbabwe Football Association, uthe ukungezwani okukhona eqenjini kumele kuxazululwe njalo kube lohlelo lweminyaka emihlanu lokuvuselela iqembu.
Uthe kubuhlungu ukubona isimo iHighlanders ekuso, ikakhulu ngoba liqembu akhule elisekela. Ukhulume lokhu kuPodcast yeZimpapers, i-Bulawayo’s Finest, eyethulwa ngumhleli uLimukani Ncube.
UBanda uthe sekuyisikhathi sokuthi amalunga eHighlanders ayekele ukusolana, ahlangane asebenzele ukuvuselela iqembu.
“Nxa ngikhuluma ngeHighlanders lesimo ekuso khathesi, kungizwisa ubuhlungu ngoba liqembu engalisekela kusukela ngisengumntwana. Ngangithengisa amahalantshisi emidlalweni yabo enkundleni yeBarbourfields,” kutsho uBanda.
“Ukubona iHighlanders ikulesi isimo kuyadabukisa kakhulu. Kodwa okuqakathekileyo yikuthi abantu kumele bayekele ukukhombana ngeminwe, bahlangane bazame ukwakha leli qembu elikhulu, ngoba nxa iHighlanders inqoba, wonke umuntu uyathokoza.”
UBanda uthe enye inkinga ebhekane leHighlanders yikuswela uhlelo olucacileyo olutshengisa lapho iqembu elifuna ukuba khona eminyakeni ezayo.
Uthe iqembu lilethuba lokusebenzisa ulwazi lwabaphathi balo abanengi asebake basebenza kumdlalo webhola.
“Ngicabanga ukuthi enye yezinkinga ezinkulu esilazo kuHighlanders yikuthi asilalo uhlelo olucacileyo lokuthi sifuna ukuya ngaphi. IHighlanders ibusisiwe ngabaphathi abalolwazi olunengi, abantu asebeke baphatha ibhola, abanjengami, u-Omega Sibanda labanye. Kodwa enye yezinkinga ezinkulu yikuthi asihlangani,” kutsho uDube.
UBanda ucele ukuthi kubizwe umhlangano ozahlanganisa bonke abathintekayo kundaba zeBosso, lapho okungasoze kukhulunywe ngokuxabana kwakudala kumbe ukusolana, kodwa kugxilwe ekwakheni ikusasa leqembu.
“Ngikholwa ukuthi kumele sibize indaba sikhulume ngokuthi singenza njani ukuthi iHighlanders ibe liqembu elikhulu. Kumhlangano lo, akumelanga sikhulume ngokuthi umuntu wenze lokhu kumbe omunye wenze lokhu. Kumele sikhulume ngokwakha iqembu,” kutsho uBanda.
Uthe umhlangano lo kumele uphume lohlelo olucacileyo lokuthi iHighlanders sifuna ibe ngaphi eminyakeni emihlanu ezayo.
“Kumele sibe lomhlangano lapho esizakha khona umbono ocacileyo sizibuze ukuthi sifuna ukuba ngaphi eminyakeni emihlanu ezayo.
‘Kumele sibe lohlelo oluphuthumayo kanye lombono wesikhathi eside wokuthi sifuna ukuya ngaphi,” kutsho uBanda. Uphinde wakhuthaza iqembu ukuthi likhulise ubudlelwano balo lamabhizimusi ukuze lithole ukusekelwa ngemali. UBanda uthe iHighlanders ingasebenzisa kahle insuku zemidlalo ngokusondeza osomabhizimusi eqenjini.
“Siyalahlekelwa yizinto ezincane kuHighlanders, njengokuthi abaphathi banikeze osomabhizimusi amatikiti ngensuku zemidlalo ukuze beze babukele imidlalo. Nxa abadlali behlohla, iqembu linqoba, osomabhizimusi bazakhangwa. Bazabona lapho iHighlanders eswela khona njalo bangene bazosiza.”
Uthe ukungezwani phakathi kwabalandeli labanye abathintekayo sekwenze abantu abanengi besaba ukusondela eqenjini. UBanda uphinde wancoma umqeqetshi uBenjani Mwaruwari ngomsebenzi awenzayo lanxa iqembu libhekane lobunzima, esithi kumele anikwe usekelo.
“Kumele simnike udumo uBenjani ngoba usebenze kuhle kakhulu lanxa iHighlanders ibhekane lenkinga. Kumele anikwe usekelo,” kutsho uBanda.
