admin
YiNtatheli kaMthunywa
ZIKHUZA imihlolo izakhamizi zenkomponi yeSilverstream eNyamandlovu ngemva kokuba enye inkazana ikhuleliswe yindoda kanina.
Indaba le ibe mgceke ngenyanga ephelileyo lapho kuvele ukuba uMnumzana Robin Tshuma ubesethandana lendodakazi yenina athandana lalo uNomalanga Sibanda njalo sebelengane.
Kubikwa ukuba uMnu Tshuma wazakala njengendoda engayiwa yizidwaba enkomponi ngokutsho kwabasiki bebunda nanko phela amantombazane ahlala edlephana kubangwa yena.
Ekhuluma loMthunywa omunye wezakhamizi zakule indawo uMnumzana James Dube uveze ukuba lokhu okwenzakeleyo akumangalisi nanko phela lindawo ihlala iphuphuma ngendaba ezitshiyeneyo eziyizimanga njalo ezihlasimulisa umzimba.
“Izinto ezenzakala lapha ungeke uzikholwe kodwa kuyabe kwenzakele. Umntwana lo kukhanya wathathela unina indoda wathandana layo kwaze kwafika isibanga sokuba kube lomntwana.
“Umntwana lo ulesibindi esesabekayo kambe aze ayethandana lendoda embatha lonina evika ngokuthi kasi baba omzalayo lokhu kusiqede amandla,” kutsho uMnu Dube.
Uqhubekele phambili wachaza ukuba umntwana lo owathathela unina indoda, lonina abasaboni ngaso linye.
“Umntwana lo lonina abasaboni ngaso linye njalo kasahlali laye usekomalumakhe.
“Abantu baqala besakhuza baze badinwa babekela beqhubeka ngothando lwabo baze babalengane,’’ kutsho uMnu Dube.
Intatheli ixhumane loNkosazana Nomalanga Sibanda onguye owathathelwa indoda yindodakazi wavuma ukuba kuliqiniso.
“Umntanami lo kasizwani ngoba wangithathela indoda engangithandana layo wacina esiba lomntwana layo.’’ kuveza uNkszn Sibanda.
Iphephandaba likazulu lixhumane loTshuma wavuma ukuthi wake wathandana lomntaka Nkszn Sibanda kodwa wala wemba phansi ukuthi wake wathandana lonina.
“Ukuthi ngathandana lomntwana kamama uMaSibanda ngiyakuvuma kangali ngitsho lakancane ngoba ngilomntwana laye kodwa unina angikaze ngithandane laye mina ngamanga aluhlaza tshoko abantu badinga ukungigcona kuphela,” kubika uMnu Tshuma.
Ekhuluma lentatheli usobhuku wakule indawo uMnumzana Sabatha Bigboy Vundla uveze ukuba indaba enjalo iyaphila.
“Umama uNomalanga Sibanda kuthiwa wazama ukukhuza umntanakhe wathi katshiyane lokuthandana lendoda alayo khathesi kodwa umntanakhe kazange akulalele lokhu kwaze kwacina kusiba lomntwana. Uthe ngokubona kwakhe umntwana lo oselomntwana loTshuma angabe kungumntwana ofanele ukuba kusibanga sika fomu 3 kumbe 4,” kuphetha uMnu Vundla.
Online Reporter