Online Reporter
Ethel Ncube
UDOKOTELA obona ngezifuyo useveze ukuba abalimi bafuye imbuzi okuthiwa ngama-Boer ngoba azihluphi ukufuya njalo zilemali nxa uzinakekela kuhle.
UDokotela David Sibanda ubike ukuba imbuzi lezi ukuze zande esibayeni umlimi kumele abelezinto ezithile ukuze zikhule kuhle njalo zingafi.
Ekhuluma lentatheli ubike ukuba abalimi kumele babone ukuba izibaya zabo zakhiwe kuhle.
“Isibaya sakho kumele ubone ukuba usakha sibe phezulu ukuze kungabi lodaka nxa izulu lisina, udaka lwenza imbuzi lezi zihlaselwe ngumkhuhlane wamasondo.
“Isibaya kumele njalo sifulelwe kunganetheli njalo kungabi lomoya, amazinyane angagodola kakhulu alakho ukufa ebulawa ngumqando kungakho kumele ubone ukuba isibaya sakho sakhiwe safulelwa, akunetheli ngoba imbuzi akumelanga zinethwe.
“Ukudla kumele zithole ukudla okwaneleyo, utshani, amahlamvu kumbe uzithengele ukudla ukuze zibe lesisindo.
“Amanzi ngenye into eqakathekileyo, imbuzi akumelanga ziswele amanzi njalo kumele zinathe amanzi ahlanzekileyo ukuze zingahlaselwa yimikhuhlane etshiyeneyo engacina idala ukuba zibelomkhuhlane wesihudo,” kutsho uDkt Sibanda.
Ubuye waveza ukuba nxa uqala ukuba lembuzi lezi kumele ubone ukuba izinto ezifunekayo sezenele.
“Imbuzi lezi ungakazithengi qala wakhe isibaya sakho ubelamanzi njalo ukhangele amadlelo azo lapho ezizabe zisidla khona uthi usuthenga-ke imbuzi zakho.
“Nxa suthengile kumele ubelembuzi ezingabantathu kumbe ezimbili ezivele zijayele indawo yalapha ukwenzela ukuba ama-Boer akho lawo athole ukuphilisana lembuzi ezijayele indawo le,” kuphetha uDkt Sibanda.
