Online Reporter
Bhekimpilo Tshalibe
INKAMPANI ye-Capital Foods, ethengisa ukudla kwezifuyo, isixwayise abalimi ngendlela abangazilandela ukuze befuye ngendlela elohlonzi imidlwane yengulube.
UDokotela Phillipha Chengeto onguTechnical Consultant kunkampani yeCapital Foods, ukhuthaze abalimi ngendlela abangazilandela nxa befuna ukufuya imidlwane yengulube.
Uthe ukufuya imidlwane yengulube akuhluphi njalo ukhuthaza abalimi ukuthi bebone ukuthi imidlwane iyamunya ngendlela ekhangelelweyo.
“Nxa imidlwane yengulube sizelwe sikhuthaza abalimi ukuthi babone ukuba bayasenga unina, bebone ukuthi ingono ziyaphuma uchago njalo babe sebesekela imidlwane imunye uchago lwakuqala (colostrum).
“I-colostrum iqakathekile emzimbeni wemidlwane ngoba yiyo eqinisa imzimba yemidlwane,” kutsho uDkt Chengeto. Uqhubekele phambili wathi ngemva kwamalanga amathathu ukhuthaza abalimi ukuthi behlabise imidlwane yabo.
“Ngemva kwamalanga amathathu imidlwane izelwe, sikhuthaza abalimi ukuthi benike ingulube zabo ijekiseni okuthiwa yi-iron injection. Kukanti imidlwane sikhangelele ukuthi inikwe i-creep meal,” kutsho uDkt Chengeto.
Uthe ukhuthaza abalimi ukuthi bengahlalisi imidlwane endaweni engcolileyo.
“Sikhuthaza abalimi ukuthi behlalise imidlwane yengulube endaweni ehlanzekileyo njalo bebone lalapho enathela khona ukuthi kuhlanzekile, ngoba imidlwane inganathela lapho okungcole khona iyabanjwa ngumkhuhlane wesihudo,” kutsho uDkt Chengeto. Uphethe ngokuthi okunye okuqakathekileyo yikuba imidlwane ihlale endaweni ekhudumalayo.
“Sikhuthaza abalimi ukuthi lapha abahlalisa khona imidlwane, bendlale utshani phansi njalo befake lembawula ukuze imidlwane ikhudumale,” kuphetha uDkt Chengeto.
