Online Reporter
Ugwalo: Ukuthunjwa kukaSukuzukuduma
Olwalotshwa nguGeshom MP Khiyaza
Sikumbuzo Dabengwa
Umlobi uKhiyaza kugwalo lwakhe lolu lulenhloso ezimbalwa. Okokuqala, uhlose ukukhumbuza abantu ngezindlela zokuphathwa kwezisebenzi ekhaya. Sibona imuli kaSinyoro ihlukuluza uSukuzukuduma ngokumsebenzisa engelambhadalo ngoba ethunjiwe.
Umlobi uhlose njalo ukubonisa abantu ukuba kubi ukuthumba umuntu ongamaziyo ufuna akusebenzele njengesigqili sakho. Lokhu sikubona lapho imuli kaSinyoro ithumba umntwana ngenhloso yokumsebenzisa kungelambadalo.
Eyinye inhloso ngeyokukhumbuza abazali ukuba baphile ngokuletha imibono eyakha umuzi ngezisekelo ezinhle. Sibona imuli kaSinyoro ivumelana kumqondo wokuthumba umntwana kucine kubahlupha bona njengemuli.
Umlobi ujonge ukufundisa uzulu ukuba ukhuni olungaziwayo aluthezwa. Sibona uSinyoro lomkakhe bethumba umfana oliSakade, oweza lemikhutshana yakhe eyaphetha ibasa kogoqwanyawo bodwa ngenxa yokuzenza bona abangamaqhalaqhala.
Eyinye inhloso ngeyokukhumbuza abadala ukuba umzenzi kakhalelwa kukhalelwa umenziwa. Sibona uSinyoro lomkakhe sebedinga usizo esigabeni, enduneni kwehlule ngoba benza okokuthumba uSukuzukuduma bengabuzanga lasenkosini eyacina isala ukubasiza.
Eyinye injongo kamlobi ngeyokukhumbuza abalochuku ebantwaneni bokuza ekhaya ukuba kubi ukukhetha abakho abantwana bangelusiswa nkomo kodwa abanye bathwale nzima besebenzela abanye abantwana.
Sibona uMaGumbo ekhetha abantwana aze ancitshe uSukuzukuduma ukudla yena emelusela izinkomo zakhe. Abakhe abantwana babengenzi leyomisebenzi kaSukuzukuduma.
Eyinye injongo kamlobi ngeyokukhumbuza abaphethe abantu ukuba kukhona izinyanga ezingaqondanga, izinyanga zamanga. Sibona kugwalo inkosi ibulala inyanga eyayileqiniso itshiya eziyisitshiyagalo lunye ezazilamanga ngesikhathi kudingwa uSukuzukuduma esethunjiwe.
Eyinye injongo ngeyokuveza ukuba izisebenzi lazo zingabantu ziyacabanga. Sibona isisebenzi sikaSinyoro sisala ukuyathumba umntwana siphenduke endleleni. Sibona uZimba ephenduka endleleni ebonisa uSinyoro ukuba akulunganga ukuthumba umuntu ekuphileni kodwa bona bakutshaya indiva lokho beyimuli.
Siqhubeka sibona umlobi eveza eyinye yezinhloso iyikukhumbuza uzulu ukuba impinda muva yingozi. Sibona uSukuzukuduma esengogila imikhuba ephindisela ababekwenza kuye ngokugila imikhuba acine esebabulele bonke abakoSinyoro.
Asihlanganeni kwelizayo bafundi.
