Online Reporter
YiNtatheli kaMthunywa
IQEMBU leTelOne seliphinde latshintsha umqeqetshi, lehlukana loSaul Chaminuka, labiza uJoel Luphahla.
Iqembu leli ngoLwesibili liqinisekise ukuthi uChaminuka usehlukene leqembu ngemva kokuba inhlangothi zombili zivumelene ukuqeda isivumelwano.
“Iqembu lithanda ukubonga kakhulu uCoach Chaminuka ngomsebenzi awenzele iqembu. Simfisela okuhle kuphela emisebenzini yakhe ezayo,” kutsho iTelOne kumbiko walo.
Ukubuyela kukaLuphahla kuTelOne kumvumela ukuthi aphinde asebenze lapho aphumelela khona kakhulu njengomqeqetshi, ngesikhathi eqondisa iqembu ukungena kuPSL ngo2018.
Umsebenzi wakhe wokuqala uzakuba ngowokuzama ukuvuselela inhlanhla yeTelOne, elwa ngamandla ukuthi ingehli kuligi yePSL.
Ukubuyela kwakhe eTelOne kufike kungakapheli inyanga esuke kuFC Platinum, mhlaka 28 Ntulikazi. Umqeqetshi weSouth Africa uThabo Senong nguye owathatha isikhundla sakhe eZvishavane.
Ngaphambi kokuya kuFC Platinum, uLuphahla waba lesikhathi esihle kuSimba Bhora, lapho aqondisa khona iqembu ukuthi liqede lisendaweni yesithathu kuPSL ngesizini ka2025.
Wake wasebenza njalo kuHighlanders njengomsekeli kamqeqetshi, ngaphambi kokuthi anikwe umsebenzi wokuba ngumqeqetshi okwesikhatshana.
