YiNtatheli kaMthunywa
KULENDODA eleminyaka engu-40 yokuzalwa yeGweru egwetshwe ngemva kokuhlahlela umalumayo kathathu ngehloka ekhanda, kulandela ukungazwanani ngokuthenga utshwala ngemali ayithola ngemva kokuthengisa umquba.
UBlessed Bhebhe utholakale elecala lokuhlukuluza ngokutshaya umamangala oleminyaka engu-56 yokuzalwa esiqintini seNtabeni, eLower Gweru, mhlaka 4 Ncwabakazi 2026.
Ngokutsho kweNational Prosecuting Authority of Zimbabwe (NPAZ), uBhebhe wafika ngakibo emini, wafica umamangala epheka emkulwini.
Kubikwa umamangala wambuza ukuthi kungani esebenzise imali yomquba ukuthenga utshwala kulokuthi ngabe uthenge ukudla, uBhebhe wazonda wadobha ihloka wamhlahlela ngalo kathathu ekhanda wasuka wabaleka.
Umamangala wabikela amapholisa ngodaba lolu, okwabangela ukuthi uBhebhe abotshwe.
Umtshutshisi uveze ubufakazi obuvela kubodokotela ngokulimala kukamamangala.
UBhebhe ugwetshwe ukuhlala ejele okwenyanga ezintathu, kodwa isigwebo lesi sesulwa kukhangelelwe ukuthi angadali icala elifanayo kuminyaka emihlanu ezayo. Lokhu kutsho ukuthi kasoze aye ejele nxa engaphindanga wenza icala elifana laleli phakathi kwesikhathi leso.
I-NPAZ ithe udlakela emulini licala elingenza umuntu ajeziswe ngumthetho njalo kunxuswa uzulu ukuthi abikele amapholisa ngazo zonke izehlakalo zokuhlukuluzwa.
Ithe ukuba yizihlobo akusiyo mvumo yokuthi umuntu ahlasele loba atshaye ilunga lemuli yakhe.
