Innocent Kurira
IHIGHLANDERS ikhangelele ukubuyela endleleni yokunqoba ngesikhathi isamukela iManica Diamonds enkundleni yeBarbourfields ngeSonto.
Iqembu leli, liphenduka kumncintiswano weligi ephakemeyo ngemva kokunqotshwa 1-0 yiDynamos, kumdlalo obuyingxenye yokuthakazelela iminyaka elikhulu yasungulwa.
IBosso yaba losuku olungaluhle phambi kwabalandeli bayo, iDeMbare ikhokhela ngebhola elahlohlwa nguFrank Agyemang.
Ukwehlulwa lokhu kuphazamise amacebo eHighlanders, ebifisa ukuthakazelela iminyaka elikhulu yasungulwa ngokunqoba iDynamos, engelinye lamaqembu elincintisana lawo kakhulu. Lanxa inganqobanga, iHighlanders ibonge bonke abancedisa ukuthi imikhosi yeminyaka elikhulu iphumelele.
Kumbiko wayo, iBosso ibonge uHulumende, abaqondisi bomdlalo wenguqu, abaxhasi, abalandeli labanye ababa lesandla ekuphumeleleni komkhosi.
NgeSonto iBosso izabeka eceleni ukwehlulwa yiDynamos, ikhangele umdlalo weManica Diamonds, lapho umqeqetshi uBenjani Mwaruwari azabe ethemba ukuthi abadlali bakhe bazaguqula ukudlala kwabo kulethe impumela enhle.
UMwaruwari uvumile ngemva kokwehlulwa yi-Dynamos ukuthi iqembu lakhe liqale umdlalo lingadlali kuhle, kodwa latshintsha ngesikhathi umdlalo uqhubeka. Uveze njalo ukuthi iqembu lilomkhuba wokwehluleka ukusebenzisa amathuba okuhlohla.
Kweminye imidlalo kuCastle Lager Premier Soccer League, ngoMgqibelo iZPC Kariba izadibana le-Agama eNyamhunga Stadium.
I-FC Platinum izamukela iCAPS United eMandava Stadium, ngesikhathi iSimba Bhora idibana leHerentals College eWadzanayi Stadium.
IMWOS izadibana leTriangle eNgoni Stadium, iBulawayo Chiefs yamukele iNgezi Platinum Stars eLuveve Stadium, iTelOne idibane leHunters eAscot Stadium, ngesikhathi iDynamos izadlala leHardrock eRufaro Stadium.
Umdlalo obuphakathi kweScottland leChicken Inn wedluliselwe phambili ngenxa yokuthi iScottland izabe imela ilizwe kumqhudelwano we-CAF Champions League.
Imidlalo yeCastle Lager Premier Soccer League:
NgoMgqibelo: ZPC Kariba v Agama (Nyamhunga Stadium), FC Platinum v CAPS United (Mandava
Stadium), Simba Bhora v Herentals College (Wadzanayi Stadium), MWOS v Triangle (Ngoni
Stadium), Bulawayo Chiefs v Ngezi Platinum Stars (Luveve Stadium), TelOne v Hunters (Ascot
Stadium), Dynamos v Hardrock (Rufaro Stadium)
NgeSonto: Highlanders v Manica Diamonds (Barbourfields Stadium).
