Online Reporter
Fungai Muderere
INHLANGANISO yeZimbabwe Tourism Authority (ZTA) ibike ukuba ezemidlalo zilomthelela omkhulu ekuvuseleleni amabhizimusi abona ngokuvakatsha lokugcinwa kwabavakatshi kuleli.
Ibike lokhu ngesikhathi ilizwe lisamukela iqembu leSouth Africa lekhilikithi yabesifazane, amaLady Proteas azadlala lamaLady Chevrons emidlalweni emihlanu ye-T20I eQueens Sports Club koBulawayo. Imidlalo le iqale kuliviki njalo iphela mhlaka 19 Mpandula.
I-ZTA ithe ukuza kwamaLady Chevrons lithuba elikhulu lokubonisa idolobho lakoBulawayo njengendawo eqhuba imidlalo edibanisa amazwe.
Umphathi weZTA esabelweni sakoBulawayo, uLindarose Ntuli, uthe ukuvakatsha kweqembu leSouth Africa kukhulu ukwedlula ikhilikithi, echaza ukuthi ezemidlalo ziyindlela eqakathekileyo yokuphakamisa indawo lokuhuga izivakatshi.
“Ezokuvakatsha kwezemidlalo ziqhubeka zingumgogodla oqakathekileyo ekwandiseni inani labavakatshi lokwenza indawo ibonakale. Ukwamukela amaqembu amazwe omhlaba afana leSouth Africa akucini ngokutshengisa ukuthi uBulawayo uyenelisa ukuphatha imidlalo yezinga eliphezulu, kodwa kunika njalo ithuba lokuthuthukisa isiko lethu lokwamukela kwethu izethekeli,” kutsho uNtuli.
“Lilungelo elikhulu ukwamukela amaLady Proteas kuhambo lwabo lwakuqala.”
Ukuza kweqembu leSouth Africa eQueens Sports Club kunika amabhizimusi ithuba lokuziveza ngcono, njengoba amahotela, indawo zokudlela lamanye amabhizimusi ezokuvakatsha akhangelelwe ukuthi abelenzuzo. Kukhangelelwe njalo ukuthi kuvulwe lemisebenzi kumabhizimusi asacathula, asondelane lezemidlalo lokuvakatsha.
Ukusondelana kweZimbabwe leSouth Africa kwenza lolu hambo lube ngolokuqakatheka okukhulu, njengoba amazwe womabili elezibopho eziqinileyo kwezemidlalo, emasikweni lezokuvakatsha.
Kusenjalo, amaLady Chevrons azimisele ukuthi atshengise abathandi bomdlalo ukuthi ayenelisa ukumelana lamaLady Proteas enkundleni.
