Gilbert Munetsi
KULOMFELOKAZI ophakathi kwetshe lembokodo kulandela ukuhlaselwa ngenye inyanga isithi ifuna isikwelede se-US$250 000, okuyimbadalo yabondofa abaphiwa umkakhe.
Inyanga le, uKhulu uAmos Kafera wepulazini leGaths eBeatrice, kubikwa wabiza umfelokazi lo emzini wakhe ngemva komngcwabo womkakhe, wamtshela ukuthi kumele abhadale i-US$250,000 yabondofa abanika umkakhe.
Indaba le, isifike emapholiseni, njalo kubikwa ukuthi impahla lemali okulinganiselwa ku-US$33 000 sekutholakele ngesikhathi kuchwayisiswa.
Abafakazi abaqotho baveze ukuthi udaba lolu lwavela egcekeni ngemva kosuku olulodwa nje umfelokazi engcwabe umkakhe.
UKhulu Kafera kuthiwa watshela umfelokazi ukuthi yena labantwabakhe bazakufa nxa bengabhadalanga isikwelede leso.
Udaba lolu kuthiwa lwathatha olunye uhlangothi olwesabekayo lapho uKhulu uKafera athatha khona inhlathu enkulu eyayisesakeni, wayikhupha phambi komfelokazi wamtshela ukuthi ngeyomkakhe.
Ngenxa yokwesaba, umfelokazi lo kubikwa wavuma ukuthi uzabhadala isikwelede lesi.
UKhulu Kafera kuthiwa wathuma izisebenzi zakhe ukuthi ziyethatha ithalakitha, ikhuba lokulima, imota yohlobo lweToyota Dakur, inkomo ezingu-13 lemali engange-US$13 000.
Impahla lemali okuthiwa kwathathwa emzini womfelokazi kubiza imali edlula i-US$60 000.
Umfelokazi lo ubelokhu ebanjwa ngamandla ukuthi akhiphe enye imali engange-US$48 200.
Ngothwala nzima yedwa, umfelokazi wacina ebikela izihlobo zakhe ngodaba lolu. Izihlobo zamtshela ukuthi indlela ayethathelwe ngayo impahla yayingekho emthethweni. Omunye wabazukulu bakhe kuthiwa waya
emzini wenyanga le, wayathatha ithalakitha lekhuba lokulima, ngemva kwalokho umdeni wabikela amapholisa eBeatrice.
Amapholisa aqinisekise ukuthi asachwayisisa ngodaba lolu, lokusolwa kokuqilibezela umfelokazi impahla lemali.
UKhulu uKafera kaqalisi ukutholakala ephambanisa umthetho ngoba useke waba lamanye amacala afana laleli.
Wake wabika ukuthi wayesebenzisa ondofa ukuncedisa abafundisi, abaphurofethi, osomabhizimusi, abathengisa umzimba, abanikazi bamakhombi, abatshayeli bamagonyethi labathengisa izimota.
Luyaqhubeka ebulenjini
Wathi abanye abantu bafika kuye befuna amandla okuphurofitha emabandleni, abanye befuna inotho, ukulungisa imitshado kumbe ukubuyisa izithandwa zabo ezabalekayo.
UKafera wake wathi wavusa umzukulu wakhe, uWatson, owayesefile okwensuku ezine eMufakose. Wathi wamnika inamunede engamalitha amabili, “wavuka” kwabafileyo.
Waphinda wabika ukuba uncedisa abantu abedlula 150 ngosuku, njalo amandla akhe avela eMalawi.
Wake wakhuluma njalo ngokuthi wancedisa umdeni ongasekho emhlabeni owawudume ngenotho ngendlela eyayingacacanga ukuthi imali yayivela ngaphi, esithi wawuthole uncedo kuye ukuze uthuthuke empilweni.
Ngesikhathi somkhuhlane we-COVID-19, watshela intatheli ukuthi wayegcwalelwa ngabantu ababefuna umuthi wesiNtu. Kodwa, wayekhuthaza abagulayo ukuthi baqale ngokuyahlolwa ezibhedlela.
