KUSABATSHAZWA ulunya lesihluku somfundisi osambholofidi (43), lenkosikazi yakhe (24), abasolwa ngokuthumba lokudlwengula owesifazane maqede babulala ingane yakhe (owesifazane) elenyanga ezine.
Ngokwemibiko ye-eNCA, lesi sehlakalo senzakale ngoLwesithathu ebusuku, eDieptsloot, eGoli.
Kuthiwa owesifazane lo, ubeyolatshwa ngumfundisi emfuleni iHennops. Ngokwemibiko ye-eNCA, ithi lona wesifazane uveze ukuthi ubengasonti esontweni lalo mfundisi, kodwa walayelwa ngomunye ukulivakatshela isonto lakhe ukuze ezolatshwa, njengoba ayengaphilile lengane yakhe. Uthi umfundisi wamtshela ukuthi kuzomele ayogeza.
Uthi ngosuku lwesehlakalo, wahamba lengane yakhe, umfundisi lenkosikazi yakhe njengoba wayesiyageza emfuleni.
Uthi babe sebetshiya ingane lenkosikazi, wahamba lomfundisi bebheke emfuleni. Uthi sebefikile khona, umfundisi wamlaya ukuba akhulule amgeze, kepha wamdlwengula.
Eseqedile, uthi ube esembophela esihlahleni esiseduze lomfula, wamtshiya khona, wahamba lenkosikazi yakhe lengane.
Ingane yalona wesifazane itholwe isibulewe
Uthi ukwazile ukuzikhulula, wabaleka wazithela enkampanini eseduze, lapho abatshayele onogada abazimele lamapholisa.
Uthi usuke lamapholisa kwayofunwa umfundisi lowakwakhe, bathola inkosikazi ephekwe ngemibuzo, yagcina iveza ukuthi ingane ibulawe yagqitshwa emgodini ongasemfuleni abebekuwo.
Ikhosikazi noma isibotshiwe, ithe kayimazi umyeni wayo ukuthi ukuphi
Kuthiwa inkosikazi kamfundisi ikhokhele amapholisa yayawatshengisa lapho okugqitshelwe khona ingane, yabe isiyabotshwa. Loba ibotshiwe, ithe kayimazi ukuthi umyeni wayo ungaphi.
Okhulumela amapholisa eGoli, uCol Dimakatso Nevhuhulwi, uthi amapholisa asebenza ngokuzikhandla ukuqinisekisa ukuthi lo mfundisi uyabanjwa, abotshwe.
