Online Reporter
Mbulelo Mpofu
KWABESIFAZANE besigabeni seMatobo eMatabeleland South, umncintiswano we-My Beautiful Home (MBH) Painted Hut Contest awucini ngokuba ngumncintiswano wokucomba izindlu kuphela, kodwa usuphenduke waba yindlela yokulondoloza amasiko, ukuthuthukisa ubuciko, ezokuvakatsha, ukulondolozwa kwemvelo lokuthuthukisa umphakathi.
Umncintiswano lo uqhutshwe ngoLwesihlanu ngeviki edluleyo eMagugu International Heritage Centre, lapho abesifazane abavela endaweni ezehlukeneyo zeMatobo abahlangane khona betshengisa ubuciko babo ekudwebeni lokucomba izindlu zabo ngokwesiko lesiNdebele.
Lolu hlelo lwasungulwa nguVeronique Attala, oweFrance, umuyi uPathisa Nyathi loJohn Knight.
Abaphatheke kulumcintiswano basebenzisa impahla yemvelo egoqela umlotha lenhlabathi ukucomba izindlu zabo.
Abanqobi baphiwe imivuzo etshiyeneyo.
Umqondisi weMagugu International Heritage Centre u-Allington Ndlovu ubengumphathi wohlelo kukanti abajabulisa uzulu nguLewis Ndlovu, abafundi beWhitewaters Primary School lomculi weTshibilika uMaqed’imbuzi.
Obengumhlonitshwa omkhulu, uDokotela Mthuthukisi Ncube, ongumbalisi ku-Institute of Development Sciences eNational University of Science and Technology (Nust), uthe loluhlelo selutshengise ukuthi amasiko angasetshenziswa ukuthuthukisa umnotho.
Uthe ubuciko obenziwa ngabesifazane laba bungaba ngamathuba ebhizimusi, ngakho umphakathi kumele ukuqakathekise lokhu.
“Umncintiswano lo uyindlela yokukhulisa umnotho ebantwini. Imidwebo eyenziwa ngabesifazane laba ilamandla amakhulu njalo ikhuthaza abantu bonke,” kutsho uDkt Ncube.
Kusenjalo, izikolo ezigoqela iLushumbe School kuWard 17, iNyumbane School, iTohwe Secondary School le-Silozwe Primary School lazo zinikwe izihlahla zokuhlanyela. Ukuba khona kwabafundi kukhangelelwe ukuthi kwenze abantwana bafunde ngamasiko besebancane, ngasikhathi sinye bakhulise uthando lokulondoloza amagugu.
Abesifazane abenze kuhle bathole imivuzo nguSilibaziso Mthethwa (Ward 24), uThubelihle Ncube (Ward 18), Sehliselo Ndlovu (Ward 15) loLovegirl Ndlovu (Ward 18).
ULovegirl uthe ukunqoba kwakhe kulandela ukusebenzisa izifundo azithola emncintiswaneni womnyaka odluleyo.
“Ngiyathokoza ukuthi nginqobile ngoba ngomnyaka odluleyo angizange ngiphumelele. Lokho kwangenza ngazidla ingqondo ngaguqula imidwebo yami.”
IZimbabwe Tourism Authority (ZTA), ebimelwe nguRegional Manager wayo koBulawayo, uLindarose Ntuli, unike abesifazana abathathu abanqobileyo ilembu lesizwe.
