Blessing Chizhande
Mthabisi Tshuma
IMBONGI edumileyo yeGwanda uNqindi izakuba ngomunye wabazakuba kumcimbi wokwethulwa ngokusemthethweni komncintiswano kaMr loMiss Rural Zimbabwe ozakwenziwa mhlaka 4 Mfumfu eMbuya Nehanda National Monument eHarare.
UNqindi kukhangelelwe ukuthi ajabulise abalandeli emcimbini omkhulu wokuvala umncintiswano lo ozakwenziwa eHeritage Village eHarare mhlaka 22 Mfumfu.
Umncintiswano kaMr loMiss Rural Zimbabwe, osokulesikhathi ungaqhutshwa, usuphendukile njalo kukhangelelwe ukuthi unike amantombazana emaphandleni amathuba okuthuthukisa amathalenta abo kwezokutayila.
UNyasha Phiri weGokwe, eMidlands nguye owathatha isicoco sokucina somncintiswano elizweni, kukanti u-Abigail Mabhoni weMasvingo nguye owaba ngowokuqala ukuthatha isicoco somncintiswano lo, ngomnyaka ka-2004.
Njengengxenye yomcimbi wokwethulwa komncintiswano lo, ozakwenziwa eduze kwamahofisi eZimbabwe Tourism Authority (ZTA), ingxenye yomgwaqo uSamora Machel Avenue izavalwa okwesikhatshana ukuze kuvunyelwe ukwenziwa kohambo lomphakathi.
Ekhuluma lentatheli, uNqindi uthe uyajabula ngethuba lokuthi azokwethulela abantu abanengi umsebenzi wakhe eHarare njalo abe lengxenye ekuvikeleni amasiko elizwe.
“Ngiyajabula kakhulu ngethuba lokuthi ngizokwethulela abantu abanengi umsebenzi wami njalo ngibe lengxenye ekulondolozweni kwamasiko eZimbabwe.
“Ukuya eHarare kuzanginika ithuba lokusebenza labanye abaculi, ukufunda lokukhula kwezobuciko, ngasikhathi sinye ngiqinisekisa ukuthi umsebenzi wami uqhubeka uyingxenye eqakathekileyo ekulandiseni indaba yeZimbabwe,” kutsho uNqindi.
Umsunguli lomhleli kaMr loMiss Rural Zimbabwe uNkosikazi Sipho Mazibuko uthe amalungiselelo omcimbi asesezingeni eliphezulu njalo iqembu lakhe lisebenza nzima ukuqinisekisa ukuthi konke okuqondane lomcimbi kuyaphumelela.
“Kuzakuba lohambo lomphakathi eduze kwamahofisi eZTA oluzakhokhelela eMbuya Nehanda National Monument, lapho esizabukisa khona ubuhle bemvelo kanye lezindawo ezililifa lesizwe.
UMazibuko uthe umcimbi wokwethulwa komncintiswano lo uzagoqelwa njalo ngumgido wokuthakazelela amasiko eZimbabwe kusetshenziswa izinkondlo.
“Kuzakuba ngumkhosi omkhulu lapho esinxusa khona izinduna, ikhansili yezinduna kanye lezinduna ezitayilayo.
“UNqindi ovela eGwanda uzakuba yingxenye yemicimbi ezayo njengoba sithakazelela umsebenzi wakhe omkhulu kwezobuciko,” kutsho yena.
Abahleli bomncintiswano lo bathi ukukhetha indawo elilifa lesizwe bekuyinjongo yokunika amantombazana emaphandleni azancintisa ithuba lokwazi imbali yeZimbabwe, ngesikhathi betshengisa inotho yesizwe.
UMazibuko uthe umcimbi lo uzahlanganisa ezamasiko, ezokuvakatsha, ilifa lesizwe kanye lokuthuthukiswa kwamantombazana emakhaya, okwenza ukuthi ukwethulwa kwawo kube yinto edlula umncintiswano wobuhle nje kuphela.
UMiss Rural Zimbabwe ngumcintiswano ohlukileyo ngoba uqondiswe kakhulu kumantombazana emaphandleni, avame ukunganakwa njalo angela mathuba afanana lalawo atholwa ngamantombazana asemadolobheni.
Umncintiswano lo uhlose ukukhuthaza Ubuntu, ukuzethemba lokuthuthukiswa kwamantombazana emaphandleni, ngesikhathi ephiwa inkundla yokutshengisa amathalenta awo, ubuhle kanye lelifa lawo lamasiko.
Abahleli bathemba ukuthi umncintiswano walonyaka uzaqinisa ubudlelwano phakathi kokuthuthukiswa kwezindawo zemaphandleni, ezokuvakatsha kanye lokulondolozwa kwamasiko, ngesikhathi ukhuthaza amantombazana asakhulayo ukuthi aziqhenye ngemvelaphi yawo njalo abe lesandla ekuthuthukiseni izigaba zabo.
