Online Reporter
Nkosilathi Sibanda
UMDLALI webhola wakuleli uThandolwenkosi Ngwenya uthole umklomelo wakhe wokuqala omkhulu eSouth Africa ngemva kokukhethwa njengomdlali owedlule bonke ngenyanga kaNcwabakazi.
Umgadli weqembu leMaZulu lo, oleminyaka engu-23 yokuzalwa, uqalise isizini ka-2026/27 elomfutho, nanko usegaxe entanjeni amabhola amahlanu waphinda wancedisa ekuhlohlweni kwebhola elilodwa eqenjini.
Ukuhlohla kwakhe amabhola kuphathise kakhulu ukuthi AmaZulu aphakame kungalane yeligi yeBetway Premiership, njalo sekumenze waba ngomunye wabadlali abaqakathekileyo abazancintisela isicoco seGolden Boot.
Ukukhethwa kwakhe kusicoco kuyimpumelelo enkulu kuNgwenya, selokhe wasuka kuFC Platinum.
Amabhola awahlohlayo amenze wathatha isicoco lesi phambi kukaVictor Letsoalo oweTS Galaxy loLebone Seema oweOrlando Pirates.
Kusenjalo, iqembu leMaZulu likhumbuze omunye wabalandeli bayo ukuthi uNgwenya udabuka eZimbabwe.
Lokhu kuza ngemva kokuba umlandeli lo ebuze ukuthi kungani uNgwenya engazange abizwe eqenjini leBafana Bafana.
Umlandeli lo osebenzisa ibizo elithi Thokozani kaSimon ku-X, ubuze ukuthi kungani uNgwenya engazange abizwe ngemva kokuqala kuhle kuligi yeBetway Premiership.
Ubhale wathi: “Kungani umdlali ohamba phambili ngokuhlohla engekho eqenjini leBafana Bafana? UNgwenya kumele abizwe.”
Iqembu liphendule lathi: “Kodwa ungumdlali wamaWarriors.”
Ukudlala kuhle kukaNgwenya kumenze wabizwa eqenjini lamaWarriors.
Umgadli lo ufakwe kuqembu lamaWarriors elikhokhelwa ngumqeqetshi uRamon Catala, elamenyezelwa ngoMgqibelo odluleyo, elizaphatheka kumidlalo yokukhankasela ukungena ku-Africa Cup of Nations ka-2027 leSierra Leone leDemocratic Republic of Congo (DRC).
IZimbabwe izadlala leSierra Leone mhlaka-24 Mpandula, ibisisamukela iDRC ngemva kwamalanga amane, mhlaka-28 Mpandula.
