Online Reporter
YiNtatheli kaMthunywa
UMDLALI weqembu lelizwe uThandolwenkosi Ngwenya ungene emdlalweni weSouth African Premier Soccer League ngempelaviki ethwele umthwalo omkhulu ngemva kokusolwa kakhulu lokusongelwa ngokubulawa kanye lokugxekwa ngumqeqetshi wakhe.
UNgwenya, odlalela iMaZulu, ubhekane lesimo esinzima ngemva kokulimala komdlali we-Orlando Pirates uSihle Nduli emdlalweni odluleyo, okwabangela ukuthi asolwe kabuhlungu enkundleni zokuxhumana.
Kodwa umdlali lo uphendule bonke ababemsola ngendlela ebabazekayo ngesikhathi iMaZulu inqoba iSiwelele 2-0 eKings Park Stadium ngoMgqibelo.
UNgwenya ubelesandla kubhola elihlohlwe kuqala ngaphambi kokuthi yena ngokwakhe atshaye elesibili, eqinisekisa ukuthi iMaZulu ithatha imiklomelo emithathu.
Ukusebenza kwakhe kube yimpendulo ecacileyo kulabo ababemsola, kwatshengisa ukuthi lanxa ebhekane lengcindezi enkulu, akazange avumele inkulumo zangaphandle kwenkundla ziphazamise indlela adlala ngayo. Umdlalo webhola ugcwele ukuncintisana, kodwa akusoze kwamukeleka ukuthi abadlali basongelwe ngokufa ngenxa yokwenzakala komunye umdlali enkundleni.
Okunye okwenza udaba lolu lube buhlungu yikuthi uNgwenya wasolwa langumqeqetshi wakhe ngesikhathi esesimeni esinzima.
Iqembu kumele libe yindawo lapho umdlali azizwa evikelekile, ikakhulu nxa ebhekane lokusolwa ngabalandeli.
Abanye abadlali bebengalahlekelwa yikuzethemba esimeni esinje, kodwa uNgwenya wakhetha ukuphendula ngezenzo zakhe enkundleni.
Ukusiza ekuhlohlweni kwebhola lokuqala lokutshaya elesibili kuveze amandla akhe engqondo kanye lokuzimisela kwakhe ukuqhubeka esebenza nzima lanxa ebhekane lobunzima.
Ukusebenza kwakhe kufanele kube yisifundo kubalandeli labadlali ukuthi abadlali labo ngabantu abalemizwa, abathwala ingcindezi futhi abathinteka ngamazwi akhulunywa ngabo.
Ukunqoba kweMaZulu bekubalulekile, kodwa indlela uNgwenya aphendule ngayo, kube yinto eqakatheke kakhulu. Utshengise ukuthi kasoze ethuswe, ahlukunyezwe kumbe adilizwe yimibono lensolo zabalandeli.
UNgwenya ungumdlali osakhulayo njalo iMaZulu kumele imsize ukuthi akhule ngokuzethemba, imnike ukusekelo kanye lemfundiso yobungcwethi ukuze aqhubeke etshengisa ithalenta lakhe.
