Online Reporter
Nkosilathi Sibanda
UMDLALI wenguqu wakuleli uJoey Phuthi usedlalela i-Eastbourne Borough eNgilandi kulandela ukutshiya kwakhe iqembu leSheffield Wednesday ngoNkwenkwezi.
Iqembu le-Eastbourne Borough lincintisa kuNational League South, iligi yesithupha kanobhutshuzwayo weNgilandi.
UPhuthi, oleminyaka engu-20 yokuzalwa, ungomunye wabadlali bamaWarriors abakhangelwe ngumqeqetshi uMichael Nees okholwa ukuba umdlali lo ulekusasa elihle emdlalweni. Uqale ukudlalela ilizwe kumqhudelwano weMalawi Four Nations Tournament. Ungene enkundleni egqoke isikipa samaWarriors mhlaka 26 Mbimbitho nyakenye, iqembu lelizwe lidlala leKenya kulumncintiswano.
Kumbiko ophume kuqembu le-Eastbourne Borough kuliviki, umqeqetshi wayo uMatt Gray uthe bakhethe umdlali ababone ukuthi ulethalenta njalo usafuna ukufunda okunengi.
“Uphethe amathemba eqembu. Ungumdlali wasemuva osesemncane, olejubane lamandla. Ngikhangelele ngabomvu ukusebenza laye,” kutsho umqeqetshi lo.
Iqembu lithe uPhuthi limkhethele ukuthi ulesiqubu lolwazi ngomdlalo, okuzasebenza kakhulu eqenjini.
“Umdlali lo odlalela iZimbabwe uza lapha eReachTV Stadium esuka ku-Academy yeSheffield Wednesday lapho ahlohla khona amabhola amahlanu kuqembu lama-Under 20, owokucina kuyi lo abawunqoba 3-0 kuPeterborough ngoMbimbitho.”
UPhuthi wasuka kuleli esiya eNgilandi eleminyaka elitshumi lambili yokuzalwa. Uqale ukudlala inguqu kuWincobank Juniors, andubana aye kuSheffield Wednesday eleminyaka elitshumi lantathu.
Udlale kakuhle kumabanga atshiyeneyo ku-academy yeSheffield Wednesday waze wakhutshulwa wadlalela iqembu lama-Under 21 ngo2021.
Ngesizini ka2023 ulolonge leqembu elikhulu kuSheffield Wednesday. Udlale kuqembu leli okwakuqala lapho engena eyi-substitute kumdlalo wabo leCoventry City abanqotshwa nge 2-0.
