Online Reporter
Fungai Muderere
UMDLALI osakhulayo ku-pool, odabuka koBulawayo, uRichard Mushobe, uqhubeka ephakamisa ibizo lakhe emdlalweni, nanko uzamela ilizwe kumqhudelwano omkhulu we-WPA Heyball World Championships ePune, e-India.
UMushobe, oleminyaka engu-19 yokuzalwa, uzahlangana labanye babadlali be-heyball abaphambili emhlabeni emqhudelwaneni oqale mhlaka 12 Ncwabakazi, ukhangelelwe ukuphethwa mhlaka 15.
Ukukhethwa kukaMushobe kwamukelwe ngentokozo ngumphakathi we-pool elizweni, umphathi wezokukhulumisana kuZimbabwe Pool Association (ZIPA), uDonald Wadawu, uncome impumelelo yalumdlali.
“Siyaziqhenya kakhulu ngoRichard langalokho asekwenzile esasemncane kangaka. Ungumntwana okhuliswe koBulawayo njalo intuthuko yakhe ngumthombo wokuziqhenya edolobheni,” kutsho uWadawu.
“Ukumela iZimbabwe kumncintiswano weWPA World Championships yimpumelelo enkulu njalo simfisela okuhle. Sikholelwa ukuthi ulamandla okuncintisa kuleli izinga, okwenza ilizwe liziqhenye ngaye.”
KuMushobe, uhambo lokuya ePune luyisithelo somsebenzi wakhe osumthathe wamphakamisa kancane kancane emazingeni aphezulu emdlalweni we-pool elizweni.
I-WPA Heyball World Championships izahlanganisa abadlali abaphezulu abavela emazweni ayehlukeneyo, imidlalo iqhutshwa kumatafula angu-16 njalo izasakazwa kubabukeli emhlabeni wonke.
Umqhudelwano lo unika uMushobe ithuba eliligugu lokuncintisana ngemiklomelo, kanye lokuthola ulwazi olukhulu ngokudlala labadlali abakwelinye izinga eliphezulu lomdlalo.
Kwezomidlalo we-pool eZimbabwe, ukudlalela ilizwe kuyisiboniso sokukhula komdlalo.
UWadawu ukholelwa ukuthi uMushobe uzakhuthaza abanye abadlali abasakhulayo abafisa ukuphuma endaweni abadlalela kuzo bayencintisana ezingeni lomhlaba.
“Lokhu kuyisikhuthazo kwabanye abadlali abasakhulayo. Uhambo lukaRichard lutshengisa ukuthi ngokusebenza nzima, ukuzinikela lokuba lomqondo oqondileyo, ungaphuma loba ngaphi uze uyencintisa enkundleni zomhlaba,” kutsho uWadawu.
