admin
Nkosilathi Sibanda
SEZIDUMELA emansumpeni ukuthi abalandeli baka-Prince Dube bajabule ukuthi lumdlali uthethe isicoco sokuba ngumdlali ohlohle amabhola amanengi ukwedlula bonke e-Tanzania.
UDube usanda kwengeza isivumelwano sokudlala kuleliqembu ngeminyaka emibili. Umdlali lo, oleminyaka yokuzalwa engu-24, usegaxe entanjeni amabhola alitshumi lane (14) kuligi njalo kukhangelelwe ukuthi athathe isicoco sokuba ngumdlali ohambe phambili kulabanye ngokuhlohla.
Kodwa ke, usemncintiswaneni wesicoco lomdlali we-Simba FC uMeddie Kagere owaziwa ngokuthi ngu-MK7.
Laye usehlohle amabhola angu-14 kulisizini.
Iphephandaba likazulu lenelise ukuxhumana loPrince ngoLwesibili ebulenjini lapho abike ukuba ukhangelele ngelibomvu ilihlo ukuthi athole isicoco.
“Umdlali wonke ufuna ukubalelwa phezulu yikho lami ngifuna ukuthi ngithatha isicoco lesi,” kutsho lumdlali kungxoxo abelayo lephaphendaba likazulu.
Umgadli lo, osebizwa ngokuthi ngu-Beast kulelo, ubekhangelelwe ukuthi aye kuqembu le-Young Africans elidlala kuligi efanayo. Ithimu le kubikwa ibithembise ukuthenga umdlali lo ngemali eyedlula leyo ayiphiwa ku-Azam.
Online Reporter