Online Reporter
Nkosilathi Sibanda
UMKHANKASO weZimbabwe, Botswana leSouth Africa, wokucela ukuphatha imidlalo yenkezo ye-Afcon 2028 usungaphazamiseka, nanko sekulelinye ilizwe eselingene kumncintiswano lo.
Ilizwe le-Ethiopia lalo selingene emjahweni lo ngokusemthethweni ngokufaka isicelo salo kunhlanganiso yeConfederation of African Football.
Inhlanganiso ephethe imidlalo kulelolizwe, i-Ethiopian Football Federation (EFF) ibike ngoMvulo ukuthi ihambise amaphepha kuCaf, njalo isicelo sayo sisekelwa nguHulumende.
“I-Ethiopia isifake ngokusemthethweni isicelo sayo kuCaf, sokwamukela i-Afcon 2028. Isekelwa nguHulumende, iEFF ihambise iBid Handbook egcwalisa zonke izidingo njalo iqinisekisa ukuthi ilizwe likulungele ngokupheleleyo ukwamukela umqhudelwano omkhulu webhola e-Africa,” kutsho umbiko wenhlannganiso le ngoLwesibili kuliviki.
Lokhu kutsho ukuthi isicelo esihlanganisa iZimbabwe, iSouth Africa leBotswana kuzamele siqine kakhulu, njengoba amanye amazwe elifuna ithuba lokwamukela imidlalo yenkezo enkulu kubhola lenyawo e-Africa. Amazwe amathathu la, akumhlubulo ongezansi yelizwe, ahambisa isicelo sawo kuCaf.
NgoNtulikazi lonyaka, i-Caf ivule ngokusemthethweni ukwamukela izicelo zokuphatha umncintiswano we-Afcon kuminyaka ka-2028, 2032 lo-2036, ngenjongo yokukhetha amazwe azaphumelela ngendlela ecacileyo.
Nxa i-Ethiopia ingaphumelela, kuzakuba ngokwesine iphatha imidlalo le. Ilizwe leli lake laqhuba umqhudelwano lo ngo-1962, 1968 lango-1976.
Kuke kwaba lenkulumo ezithi iMorocco, eyaphatha umqhudelwano ka-2025, ingaphinda ifune elinye ithuba ngo-2028. Kodwa, imbiko yeBBC Sport Africa kuliviki ithe ilizwe leli kalisekho emjahweni ngoba seligxile emalungiselelweni enkezo yomhlaba ka-2030, elizayibambisana leSpain lePortugal.
Kusenjalo, iqembu leZimbabwe Under-23, ama-Young Warriors, asewazi amaqembu azadibana lawo emidlalweni yomkhankaso wenkezo ye-iAfcon U23.
Ama-Young Warriors azaqala ngokudlala leMauritius ekhaya, enkundleni yeNational Sports eHarare. Ngemva kwalumdlalo, zizahlangana njalo kusigaba sesibili.
Imidlalo le izadlalwa phakathi kukamhlaka 28 Mpandula kusiya ku-6 Mfumfu 2026.
Nxa iZimbabwe inganqoba, izadibana leMali.
Imidlalo yesibili izaqhutshwa phakathi kwamhlaka 9 kusiya ku-17 Lwezi 2026, kuthi ezanqoba izadibana leMalawi, Eswatini kumbe i-Algeria.
Ama-Young Warriors khathesi aqeqetshwa nguMarc Sánchez oweSpain, osanda ukuqhatshwa, encediswa nguWilson Mutekede.
